د جوزجان په آقچې ولسوالۍ کې د وطني غالیو اوبدلو او پروسېس یوه کارخونه کې دا مهال ۳ زره ۵۰۰ تنه نارینه او ښځینه کارګران په غالۍ اوبدلو او اړوند کارونو بوخت دي.
د لاسونو په وسیله دغه بېلابېلې اوبدل شوې غالۍ پر کورني بازار سربېره، نړیوال مارکېټ کې هم د پېرودونکو د خوښې وړ ګرځېدلې او په ښه بیه یې پېري.
د کارخونې مسوولین د وطني غاليو د صادراتو زياتېدو له امله د دې لرغوني او مشهور صنعت ودې ته خوشبين دي.
د غاليو اوبدلو کارخونې مسوول عبدالغفار ایلچ وايي: « موږ په یوه میاشت کې تر ۲۰۰۰ مترو پورې تولید لرو چې شاوخوا ۱۸۰۰ متره یې بهر ته استوو او تقریبا ً هره ورځ بسته بندي لرو. زموږ د تولیداتو ۱۵ سلنه پاکستان ته ځي، هغه هم یو ښه مشتري دی.»
د وطنۍ غالیو په یاده کارخونه کې کارکوونکي چې د غاليو پر اوبدلو، مینځلو او پروسېس بوخت دي، د دې صنعت پر ملاتړ ټینګار لري او له سوداګرو هم غواړي چې په مختلفو برخو کې په کور دننه پانګونه وکړي.
یو تن غالۍ اوبدونکی وايي: « موږ دلته کار کوو او په میاشتني ډول له اتو تر لسو زرو افغانۍ پيدا کوو. زما ماشومان ښوونځي ته ځي او زه دلته کار کوم.»
د غالۍ اوبدلو یو تن بل کارګر وايي: « کومې غالۍ چې دلته تولیدېږي، ټولې بهر ته ځي، ځکه موږ ته له بهر فرمایش راکول کېږي. دا ډېره ښه ده چې له بهر فرمایش راځي، ځکه موږ ټولو ته د کار زمینه برابرېږي.»
په همدې حال کې د جوزجان ځايي چارواکي په دې ولایت کې د غالۍ اوبدلو لرغوني صنعت د ودې او ملاتړ په موخه د ځینو پروګرامونو د جوړېدو خبر ورکوي.
د جوزجان صنعت او سوداګرۍ ریاست کې د متشبثینو ملاتړ مدیر غلام فاروق
یعقوبي وايي: « له دې وړاندې زموږ غالۍ د ګاونډیو هېوادونو په نوم صادرېدلې. غالۍ له دې ځایه پاکستان ته تللې او هلته یې ځینې کارونه ترسره کېدل او بیا د پاکستان په نوم نورو هېوادونو ته صادرېدلې او ډېره ګټه یې هم پاکستان ته رسېدله. اوس د غالیو اوبدل، پروسېس، مینځل او نور کارونه ټول همدلته کېږي او بیا له افغانستانه د افغانستان په نوم صادرېږي او ګټه یې هم افغانستان ته رسېږي.»
د جوزجان ولایت صنعت او سوداګرۍ ریاست د مالوماتو له مخې، د دې ولایت په مرکز او ولسوالیو کې دا مهال د غاليو اوبدلو۸۰ کارخونې فعالیت لري چې په کې ۱۲۴ زره ښځینه او ۶ زره نارینه کارګران پر کار بوخت دي.
