د اسلامي امارت د ریاست الوزرا اقتصادي مرستیال چې د یوه لوړ رتبه پلاوي په مشرۍ ازبېکستان هېواد ته تللی و، د یکشنبې په ورځ (د کب ۵ مه) کابل ته راستون شو.
ملاعبدالغني برادر له ازبېکستان څخه تر راستنېدو وروسته وویل، له ازبېکستاني چارواکو سره يې د برېښنا، کرنې او اوسپنې پټلۍ په برخو کې د همکاريو پر پراختيا هوکړې کړې او ژر به ياد هېواد د اوسپنې پټلۍ د متخصصينو يوه ډله کابل ته راولېږي او په ياده برخه کې به د ځينو مهمو پروژو سروې پيل شي.
د برادر په خبره، د برېښنا واردولو په برخه کې يې هم له ازبېک چارواکو سره خبرې رغوونکې وې او زياتوي چې له دې وروسته به ياد هېواد ته د ۵ سوه مېګاواټه برېښنا په بدل کې د ۲۵۲ ميليون ډالرو پر ځای ۲۲۲ ميليون ډالر ورکول کېږي.
د ریاست الوزرا اقتصادې مرستیال ملا عبدالغني برادر زیاتوي: « کوم قرارداد چې د برېښنا شرکت له خوا شوی و، له ازبېکستان څخه تر دښت الوان پورې د ۵۰۰ کیلو ولټ لین په اړه بحث وشو او له بحث وروسته د دې قرارداد بیه له ۲۵۲ میلیون ډالرو ۲۲۲ میلیون ډالرو ته راټیټه شوه.»
ملا عبدالغني برادر دغه راز وايي، له دې وړاندې ازبېکستان ته د افغانستان پر ځينو صادراتي توکو بندیزونه لګول شوي وو، خو د یاد هېواد له چارواکو سره تر لیدنې وروسته دغه محدوديتونه هم لرې شول.
په ورته مهال، د صنعت او سوداګرۍ وزارت سرپرست چې په دې سفر کي يې د ملا برادر ملتیا کوله وايي، د برېښنا د ستونزو په حل سره به په کور دننه د سوداګرو ستونزې هم را کمې شي.
د صنعت او سوداګرۍ وزارت سرپرست نورالدین عزیزي وايي: « هغه مهم قرارداد چې په نږدې ورځو کې به نهايي شي، په ازبېکستان کې له افغان پانګوالو او په افغانستان کې له ازبېک پانګوالو څخه ملاتړ دی. دغه کار نهايي شوی او له اداري پړاوونو تر تېرېدو وروسته به لاسلیک شي.»
په تاشکند کې د اسلامي امارت او ازبېکستان د چارواکو له بحثونو وروسته پرېکړه شوې چې د دوه اړخيزې سوداګرۍ د لا ودې لپاره به ازبېکستان د افغانستان پر ګڼو صادراتي توکو تعرفه هم ټيټه کړي.
