د کندهار ولایت د ښوراندام صنعتي پارک د وچې مېوې د پروسیس کارخونو کې د کندهار، زابل او اروزګان بېلابېلې وچې میوې پروسیس کیږي او بهرنیو هېوادونو ته صادریږي.
دغو کارخونو کې لسګونه کاريګر د وچې مېوې پروسېس په بېلابېلو پړاوونو کې کار کوي او په مياشتني ډول له۱۰ تر ۱۵ زرو افغانيو پوري عاید ترلاسه کوي.
د کارخونکې یو تن کاریګر سمیع الله وايي:« وچه مېوه له اطرافو راځي، له شاه ولي کوټ، معروف او پنجوايي ولسوالیو راځي.»
د کارخونې یو بل کاریګر حمیدالله وايي:« په دې کارخونو کې د ډېرو خلکو لپاره د کار زمېنه برابره شوې. په کندهار کې په سلګونه شرکتونه دي، په هر شرکت کې په سلګونه کسان پر کار بوخت دي.»
د کارخونو مسوولین وايي، هره ورځ انځر، ابجوشي، کشمش، شکرپاره او ځیره پروسیس کوي، چې د نورو هېوادونو په شمول زیاته برخه يې هند ته صادریږي.
د وچې مېوې سوداګر احمدولي فرزاد وايي:« موږ اوس د ابجوشي پر کار اخته یو، د انځرو، کشمشو، شکرپارې کاروبار کوو او هند ته یې صادروو. له اسلامي امارته مو غوښتنه دا ده چې اروپايي بازارونو کې بازار موندنه وکړي. اوس ۷۰ سلنه صادرات مو هند ته ځي او ۳۰ سلنه پاکستان، ایران او ځېنو نورو هېوادونو ته ځي. که چېرې اروپايي بازارونو ته ښه بازار موندنه وشي، کېدی شي چې بیې یې لوړې شي.»
ورته مهال د کندهار سوداګرۍ او پانګونې خونې مسوولین وايي، په تیرو نهو میاشتو کې د ۳۶۳ زرو ټنو زیاته وچه او تازه مېوه، طبي بوټي، معدنیات، د ډبرو سکاره، پنبه او یو شمېر نور اقلام بهر ته صادر شوې دي.
دغه صادرات د ۳۷۱ میلیونه او ۷۰۰ زره امریکايي ډالرو په ارزښت پاکستان، هند، امریکا، کاناډا، نیپال، متحده عربي اماراتو، ازبېکستان، ترکیې او چین ته شوې دي، چې زیاته برخه یې وچه او تازه مېوه ده.
د کندهار سوداګرۍ او پانګونې خونې مرستیال انجنیر عبدالباقي بینا وايي:« د سږ کال په تېرو نهو میاشتو کې، موږ شاوخوا ۳۶۳ زره ټنه صادرات درلودل چې مجموعي ارزښت یې ۳۷۱ میلیونه او ۷۶۹ زره ۹۸۴ امریکايي ډالره کېږي.»
د سويلي حوزې پر کچه زياته وچه او تازه مېوه په کندهار، زابل او اروزګان ولایتونو کې توليديږي چې د مسوولینو په وینا د هېواد د صادراتو لویه برخه جوړوي.
