د کندهار ولایت د ښوراندام صنعتي پارک د وچې مېوې د پروسېس کارخونو کې د کندهار، زابل او اروزګان بېلابېلې وچې مېوې پروسېس کېږي او بهرنیو هېوادونو ته صادریږي.
په دغوکارخونو کې لسګونه کارګران د وچې مېوې د پروسېس په بېلا بېلو پړاوونو کې کار کوي او په مياشتني ډول له ۱۰ تر۱۵ زره افغانيو پورې عاید ترلاسه کوي.
د وچې مېوې د پروسېس یو تن کارګر سمیع الله وايي: « وچه مېوه له کلیو او ولسوالیو راځي، بیا دلته صفا کېږي او ورپسې په ګودامونو کې بسته بندي کېږي او وروسته هندوستان ته صادرېږي.»
یو تن بل کارګر حمیدالله وايي: « په کندهار کې د وچې مېوې په برخه کې ډېرو کسانو ته د کار زمینه برابره ده. دلته سلګونه شرکتونه او هر شرکت کې سلګونه کسان پر کار اخته دي.»
د وچې مېوې د پروسېس کوونکو کارخونو مسوولین وايي، هر ورځ انځر، ابجوشي، کشمیش، شکرپاره، تورې وڅکې او ځیره پروسېس کوي چې د نورو هېوادونو په ګډون یې زیاته برخه هند ته صادریږي.
د وچې مېوې سوداګر حاجي احمدولي فرزاد وايي: « فعلا ً موږ د آبجوشو پر کار اخته یو، انځر دي، کشمیش دي، شکرپاره ده او ځینې نورې مېوې دې چې هندوستان ته صادرېږي. له اسلامي امارت غوښتنه کوو چې په اروپايي هېوادونو کې زموږ لپاره بازار موندنه وکړي؛ ځکه زموږ ۷۰ سلنه کار پر هندوستان تکیه دي او پاتې ۳۰ سلنه پاکستان، ایران او نورو نږدې هېوادونو ته ځي. که چېرې اروپايي هېوادونو کې بازار موندنه وشي، د دغو مېوو قېمتونه به هم دوه دری چنده ورسره پورته شي.»
په ورته مهال، د کندهار سوداګرۍ او پانګونې خونې مسوولین وايي، په تېرو نهو میاشتو کې د ۳۶۳ زر ټنو زیاته وچه او تازه مېوه، طبي بوټي، معدنیات، د ډبرو سکاره، پنبه او یو شمېر نور اقلام بهر ته صادر شوې دي.
دغه صادرات د ۳۷۱ میلیونه او ۷۰۰ زره امریکايي ډالرو په ارزښت پاکستان، هند، امریکا، کاناډا، نیپال، عربي متحده اماراتو، ازبېکستان، ترکیې او چین هېوادونو ته شوي چې زیاته برخه یې وچه او تازه مېوه وه.
د کندهار د سوداګرۍ خونې مرستیال انجینر عبدالباقي بینا وايي: « سږ کال په تېرو درېیو ربعو یا نهو میاشتو کې، موږ تقریبا ً ۳۶۳ زره ۵۲۴ ټنه صادرات درلودل چې مجموعي ارزښت یې ۳۷۱ میلیونه، ۷۶۹ زره، ۹۸۴امریکايي ډالر کېږي.»
د سويلي حوزې پر کچه زياته وچه مېوه په کندهار، زابل، اروزګان او دايکنډي ولایتونو کې توليديږي چې د مسوولینو په وینا، د هېواد د وچې مېوې د صادراتو لویه برخه جوړوي.
