د کار او ټولنېزو چارو وزارت د یونسکو جاپان موسسې په مالې مرسته ۱۵۵ تنه ځوانان په څلورو بېلابېلو برخو کې له شپږ میاشتنیو حرفوي زده کړو فارغ کړل.
د یاد وزارت چارواکي وايي، په تېرو نهو میاشتو کې د کابل په ګډون یو شمېرولایتونو کې ۳۵ زره ځوانان له بېلابېلو حرفوي او مسلکې زده کړو فارغ شوي، خو لا هم د بې روزګارۍ کچه لوړه ده.
دوی وايي، هڅه کوي له موسسو سره په همغږۍ ځوانانو ته کاري فرصتونه برابر کړي.
د کار او ټولنېزو چارو وزارت مرستیال محمد ذاهد احمدزی وايي: « متأسفانه په افغانستان کې د بېکارۍ کچه لوړه ده. موږ او په ځانګړې توګه د کار او ټولنیزو چارو وزارت غواړي چې خپلو ځوانانو ته کاري فرصتونه برابر کړي.»
ورته مهال د یونسکو جاپان موسسې مسوولینو ډاډ وښود چې راتلونکې کال کې به هم ورته پروګرامونه پلي او ځوانانو ته کاري فرصتونه برابر کړي.
په کابل کې د یونسکو جاپان موسسې رییس یما فېروزي وايي: « یونسکو جاپان پلان لري چې راتلونکی کال هم د کار او ټولنیزو چارو وزارت په همکارۍ دغه شان پروګرامونه پلي کړي. ځای لري چې په دې محفل کې د کار او ټولنیزو چار وزارت او په ځانګړې توګه کار معینت مننه وکړو.»
یما فېروزي له نورو موسسو هم غوښتنه وکړه چې د ځوانانو د بې روزګارۍ کچې کمولو کې دې مرستې وکړي.
له شپږ میاشتنیو حرفوي زده کړو فارغ شوي ځوانان خوښ دي چې تر دې وروسته د خپلو کورنیو اړتیاوې پوره کولی شي.
دوی له سرپرست حکومت او موسسو غوښتنه کوی چې ورته پروګرامونه زیات کړي، ترڅو ځوانان په کار بوخت شي او بهر هېوادونو ته يي د تګ مخه ونیول شي.
له حرفوي زده کړو فارغ شوی ځوان وايي: «هو! غواړم خپله حرفه مخکې یوسم. ما له برق سره مینه لرله او دلته مې په سمه توګه د برېښنا غځول زده کړل. له حکومت غوښتنه کوم چې ټولو ځوانانو ته د کار زمینه برابره کړي»
له حرفوي زده کړو یو بل فارغ وايي: « اوس مې چې دا کسب زده کړ، ستونزې به مې کمې شي او په بازار کې به کار پیدا کړای شم. ما د کورنیو وسایلو د ترممیم په برخه کې زده کړه وکړه او اوس کولی شم ډېری وسایل خپله ترمیم کړم. دا یو ډېر ښه کسب دی.»
د کار او ټولنېزو چارو وزارت د کار چارو مرستیال له بې روزګاره ځوانانو غوښتنه وکړه چې راشي او د حرفوي زده کړو په کورسونو کې نوم لیکنه وکړي، ترڅو ورته کاري فرصتونه برابر شي.
