د خوست ولايت په ځانګړې بودیجه د نادرشاه کوټ ولسوالۍ اړوند د ځنې خېلو سیمې او قلندر ولسوالۍ ترمنځ د ۱۴ کیلومټره سړک د جوړولو چارې پیل شوې.
چارواکي وایي، د یاد سړک د مشخص مسیر نه شتوالي او خراب وضعیت له امله د سیمې زرګونه اوسېدونکي له ګڼو ستونزو سره مخ وو، خو په خبره يې اوس چې دا سړک په اساسي توګه جوړېږي، ورسره به د دواړو ولسوالیو د اوسېدونکو د تګ راتګ ستونزې هوارې شي.
د خوست والي ویاند مستغفر ګربز وايي: « دغه سړک د خوست ولایت مقام په ځانګړې بودیجې سره جوړېږي او اړتیا ته په کتو به نوره بودیجه هم ورکړل شي. د دغو ولسوالیو خلکو ته د سړک ډېره زیاته اړتیا وه او له دې پلوه یې ګڼې ستونزې لرلې. د دې سړک په جوړېدو سره به د خلکو ستونزې هوارې شي.»
ځايي اوسېدونکي وایي، د سړک له جوړېدو سره به د نادرشاه کوټ او قلندر ولسوالیو ترمنځ تګ راتګ اسانه او خلکو ته به د ژوند په بېلابېلو برخو کې اسانتیاوې رامنځته شي.
دوی زیاتوي، د سړک نه شتوالي د خلکو ورځنۍ چارې او عاجلې اړتیاوې له خنډونو سره مخ کړې وې.
د خوست اوسېدونکی حاجي دسته ګل وايي: « د خدای شکر دی چې دا سړک په دې غاړه روان دی او جوړېږي. په دې سره به د خلکو ستونزې حل شي او ناروغان به پر وخت روغتون ته ورسول شي. له دې وړاندې به یوازې غټ موټر په دې لارو تللی شول.»
د خوست اوسېدونکی ولس خان وايي: « په دغو دواړو ولسوالیو کې ډېر زیات نفوس پروت دی او له دې امله غوښتنه کوو چې دا سړک ډېر ژر جوړ شي.»
د خوست بل اوسېدونکی ملنګ فریادي وايي: « زموږ خلک اړتیاوې لري او ستونزې لري. کله چې بارانونه وشي، په دې مسیر کې سېلابونه راوځي او لارې بندوي. نو دلته خو هم ولس پروت دی، په دوی کې هم مړی او ژوند پېښېږي، د جنازې او واده پروګرامونه وي، له همدې امله د دغو خلکو لپاره تګ راتګ ډېر سخت دی.»
د خوست ځايي چارواکي ډاډ ورکوي چې په دې ولایت کې به د مرکز او لرې پرتو سیمو د نښلولو لپاره د سړکونو جوړولو او ترمیم ته لا ډېره پاملرنه وشي.
دا پروژه داسې مهال پیل کېږي چې تازه د عليشېرو ولسوالۍ ببرک تاڼې سیمې ته د ۸ کیلومټره سړک د ترمیم چارې هم پیل شوې دي.
