د کندهار ولایت په صنعتي پارک کې د ډبرو د پروسیس یوازینۍ کارخونه د ۴۵۰ زره امریکايي ډالرو په لګښت پر دوه نیم جریبه ځمکه جوړه شوې.
د دغې کارخونې کاریګر وايي، دلته د عصري ماشینونو پر مټ له رخام، مرمر او ګرینایټ ډبرو زینتي او نور بېلابیل ډوله توکي جوړوي او بیا یې بازار ته وړاندې کوي.
د دوی په خبره چې تر ډېره په ودانیو کې استعمالیدونکې ډبرې جوړوې.
د کارخونې یو تن کاریګر وايي:« د مرمر، رخام او ګرینایټ ډبرې لرو. څوک چې کوم ډېزاین غواړي زه یې جوړولی شم.»
د کارخونې یو بل ګاریګر وايي:« دا ډبرې مو چې دلته راوړي، پریس کوو یې، دا په فرش کې هم کارېږي، په زینو کې هم کاریږي.»
د کارخونې مسوول وايي، دلته هره ورځ ۸۰ ټنه د شاولیکوټ ولسوالۍ د کانونو راوړل شوې ډبره پروسیس کوي چې لد کورنيو بازارونو تر څنګ یو شمیر بهرنیو هېوادونو ته یې هم صادروي.
د نصیب الله محمدي په خبره، که سرپرست حکومت په ودانیزو پروژو کې د دوی پروسیس ډبرې کار کړې نو تولیدات به يي زیات شي او هم به ډېرو کسانو ته د کار زمینه برابره شي.
محمدي په دې اړه وايي:« تر ډېره پورې دا ډبرې دلته په کندهار کې استعمال کېږي. انشا الله له ۷۵ تر ۸۰ ټنه ډبرې پورې پروسیس لرو. له دې موږ زینتي مواد چې د ډیکوریشن لپاره کارول کېږي، د ودانیزو چارو لپاره کارول کیږي. د دې ترڅنګ موږ د دې ډبرو صادرات پاکستان، ایران، هند، دوبۍ او چین ته هم لرو.»
په ورته وخت کې د کندهار کانونو او صنایعو خونې مسوولین وايي په دغه ولایت کې د ډبرې پروسیس یوازې دغه یوه کارخونه شتون لري، خو په خبره یې هڅه کوي په دې برخه کې نور پانګوال هم پانګونې ته وهڅوي ترڅو دلته د ډبرو پروسیس زیات شي.
د دغې خونې مشر سید سرور اماني وايي:« په دې هڅه کې یو چې ډېر شمېر دوستان پر استخراج بوخت دي، هغوی وهڅوو چې د پروسیس لپاره هم دوی ماشینونه ولري. الحمد الله ډېرو دوستانو راسره هوکړه کړې چې په راتلونکې کې به دوی د استخراج ترڅنګ د پروسیس ماشینونه هم ځای پر ځای کړي او ډبرې به نورو هېوادونو ته هم صادرې کړي او هېواد ته به د وارداتو مخه ونیسي.»
په کندهار کې د ډبرو زیات کانونو شته دي چې تر ډېره غیر قانوني پروسیس شوې ډبرې يي بهرنیو هېوادونو ته صادریږي.
