د اسلامي امارت ویاند ذبیح الله مجاهد په لومړي ځل په کوردننه د ریل ګاډي د يوې نمونې د جوړېدو خبر ورکړی دی.
مجاهد پر خپله اېکس پاڼه لیکلي، دغه ریل ګارډی د ملي پراختيا شرکت له لورې جوړ شوی او په خبره یې د ریل پټلیو تر جوړیدو پورې به افغانستان په کوردننه د توليد شوي ریل ګاډي څښتن شي.
هغه په دې اړه وايي:« د هېواد ملي پراختیا شرکت د لومړي ځل لپاره ریل ګاډی جوړ کړ. په هېواد کې د ریل پټلیو تر جوړیدو او بشپړېدو پورې به خپل ریل ګاډی هم ولرو.»
بل خوا د اقتصادي چارو کارپوهان په کوردننه د ورته نوښتونو هرکلی کوي او وړاندیز لري چې سرپرست حکومت بايد د تخنيکي وسایطو د بسته بندۍ پر ځای صنعتي توليد ته ځانګړي پاملرنه وکړي، تر څو په هر ډول تخنيکي وسایطو کې کارېدونکې پرزې پر کوردننه توليد شي.
د اقتصادي چارو کارپوه نورالله عزیز وايي:« یوازې په هغه څه باندې چې موږ فقط د پرانستې په بڼه باندې په رسنیزه بڼه باندې وړاندې کوو، زما په نظر دا بسنه نه کوي، هغه څه چې عملي پایله ولري، د هغه په اړه باید فکر وشي، ځکه هغه څه چې له حاکم نظام توقع کېږي، د عامو افغانانو د ژوند په پرمختګ کې مهم دي، هغه د پایلو بحث دی. څه باید وشي؟ څه مو کړې؟ کوم موضوعات کولی شي په عملي ژوند کې د افغانانو د غربت له منځه وړلو کې مهم رول لوبولی شي؟»
ځينې نور بیا وايي، سرپرست حکومت باید د ریل ګاډي تر جوړېدو وړاندې د ويو لارو او دغه راز ريل پټلۍ جوړېدو په برخه کې اړين ګامونه پورته کړې.
دا په داسې حال کې ده، چې له دې وړاندې هم د اسلامي امارت وياند د ملي پراختيا شرکت له لورې د يوه باروړنکي ډمټرک او مسافر وړونکي موټر د جوړېدو خبر ورکړی وو.
