د افغانستان لپاره د پاکستان ځانګړي استازي افغانستان ته د سفر پرمهال د سرپرست حکومت له یو شمېر لوړو پوړو چارواکو سره لیدنې کړې.
د دې کتنو په دوام یې د صنعت او سوداګرۍ وزارت له سرپرست سره د دواړو هېوادونو ترمنځ د سوداګرۍ او ټرانزیټي اسانتیاوو په اړه خبرې کړې دي.
د سوداګرۍ وزارت چارواکي وايي، پاکستان په خپله خاوره کې د افغاني توکو د تخليې او ټرانزېټ لپاره د یوې ساحې ځانګړې کولو ته هم چمتووالی ښودلی.
د صنعت او سوداګرۍ وزارت ویاند اخندزاده عبدالسلام جواد وايي: « په دې ناسته کې د افغانستان او پاکستان ترمنځ د تجارتي او ټرانزیټي هوکړه لیک(اپتا) د نهايي کولو او (کراس سټپېنګ) موضوع په اړه ټینګار وشو. پاکستاني پلاوي چمتوالی وښود چې د افغانستان د اموالو او ټرانیزیټ لپاره یوه ځانګړې ساحه تعیین کړي.»
که څه هم افغان سوداګر وايي، پاکستان لاهم د افغانستان د صادراتو پر وړاندې ستونزې نه دي هوارې کړي، خو د صنعت او سوداګرۍ وزارت چارواکو له پاکستاني پلاوي سره د دې ستونزو پر حلولو هم خبرې کړي.
د صنعت او سوداګرۍ وزارت ویاند په دې اړه وايي: « همدارنګه د پاکستان له خوا د تجارتي او ټرانزیټي خنډونو د لرې کولو، د بانکي تضمینونو وړاندې کولو په برخه کې د لا ډېرو اسانتیاوو جوړولو او د دوې سلنې مالیې کمولوپه اړه هم خبرې وشوې. طرفینو هوکړه وکړه چې د نړیوال تجارت له اصولو سره سم همکاري وکړي.»
د اقتصادي چارو شنونکي له پاکستان سره اقتصادي اړیکې مهمې بولي او زیاتوي چې دواړه هېوادونه دې اقتصاد له سیاست سره نه تړي.
د اقتصادي چارو شنونکی عبدالجبار ساپی وايي: « که چېرې موږ سیاست له اقتصاد او تجارت جلا کړو، دا به د افغانستان او پاکستان پر ګټه وي. که داسې ونه شي، د تېر په څېر به ستونزې ادامه ولري او دا لیدنه به یوازې یوه لیدنه او وعده پاتې خو پوره نه شي او هېڅ پایله به ونه لري.»
ځينې نور بیا ټینګار کوي چې د افغانستان سرپرست حکومت دې د اقتصادي پراختیا لپاره د پاکستان پر ځای پر نورو بدیلو لارو هم غور وکړي.
د اقتصادي چارو شنونکی محمد یونس ځدراڼ وايي: « هېڅ وخت د سیاسي اړیکو په خاطر زموږ اقتصادي برخې ته زیان ونه رسېږي. دا ډېره ښه ده چې له دوی سره موږ په اقتصادي برخه کې پرمختګ وکړو؛ زما په اند، له پاکستان پرته نورو هېوادونو سره بدیله لاره به ښه وي. موږ باید خپلو اقتصادي اړیکو ته توجه وکړو.»
د صادق خان پر مشرۍ پاکستانی پلاوی داسې مهال د افغانستان او پاکستان ترمنځ په سوداګرۍ کې د اسانتیاوو راوستلو خبره کوي چې پاکستان تل د افغانستان د تازه مېوو او موسمي محصولاتو د رسېدو پرمهال، خپلې لارې او دروازې د صادراتو پر مخ تړلې دي.
