د کانونو او پټرولیم وزارت د لوګر د التمور سیمې د سېمنټو د تولید کارخونې تړون له افغان ساکو شرکت سره لاسلیک کړ.
د ریاست الوزرا اقتصادي مرستیال په ګډون د دې تړون د لاسلیک پر مهال، د کانونو او پټرولیم وزارت سرپرست وویل، په دې پروژې شاوخوا ۱۴۵میلیونه ډالره لګښت راځي چې د ۳۰ کلونو لپاره به په ورځني ډول د ۲۵۰۰ ټنه سېمنټو د تولید ظرفیت ولري.
هدایت الله بدري په خبره، د دې پروژې عملي چارې به په نږدې راتلونکي کې په۵۱ کیلومټره مربع مساحت کې پیل شي چې د چارو د بهیر پر مهال به سلګونه ځوانانو ته کاري فرصتونه هم رامنځته کړي.
بدري په دې اړه وايي: « یاد شرکت به د دې کارخونې د جوړولو په برخه کې شاوخوا ۱۴۵ میلیونه ډالره پانګونه وکړي. دغه راز به په ورځني ډول ۲ زره ۵۰۰ ټنه سېمنټو د تولید ظرفیت ولري او په دې سره به د هېواد سلګونه ځوانانو ته کاري فرصتونه برابر شي.»
د کانونو او پيټرولیم وزارت سرپرست دغه راز وايي، دا پروژه کولی شي د التمور سیمې خلکو ته په روغتیايي او ښوونیزو برخو کې ګڼ ټولنیز خدمات وړاندې کړي.
هدایت الله بدري زیاتوي: « د ټولنیزو خدمتونو په برخه کې به د سیمې خلکو ته په طبي او تعلیمي برخو کې خدمات وړاندې کړي.»
بل پلو، د افغان ساکو په نوم د کان کېندنې، پروسېس او سوداګریزو چارو ګډ افغان – چینايي شرکت رییس د دې پروژې د لومړي فاز یا د کارخونې جوړلو لګښت ۱۴۳ ميلیونه ډالره ښيي او وايي، د وروستي فاز د چارو پیل د لومړي فاز په بشپړېدو پورې اړه لري.
د افغان ساکو شرکت رییس وو زیدان وايي، د دې پروژې له تطبیق موخه نه یوازې دوه اړخیزې ګټې دي، بلکې ترڅنګ یې د سیمې د خلکو ګټې هم شاملې دي.
هغه زیات کړه:« دا ډېر د خوښۍ ځای دی چې د افغانستان لوګر ولایت په التمور سیمې کې د سېمنټو تولید د داسې کارخونې د رغونې تړون لاسلیک کوو چې پر لومړي فاز یې ۱۴۳ میلیونه ډالره لګښت راځي چې د وروستیو برخو مخته وړلو چارې یې په لومړي فاز پوړې تړلي دي. دا څرګنده ده چې له دې ورهاخوا د دې پروژې د پراخولو په لټه کې هم یوو. له دې پروژې مو موخه یوازې د دوه اړخیزو ګټو ترلاسه کول نه دي؛ بلکې له دې لارې مو د سیمې د خلکو ګټې هم په پام کې نیولې دي.»
د کانونو او پټرولیم وزارت مسوولین دغه پروژه په هېواد کې د سېمنټو د تولید په برخه کې حیاتي بولي او وايي، دا پروژه کولی شي افغانستان د سېمنټو د تولید په برخه کې ځان بسیاینې ته نږدې او د سېمنټو په صادروونکي هېواد بدل کړي.
دا په داسې حال کې ده چې یاد وزارت له دې وړاندې هم له کورنیو او بهرنیو پانګوالو سره د ۶۲۳ میلیونه ډالرو په ارزښت د سېمنټو د څلورو سترو پروژو تړونونه لاسلیک کړي چې د یاد وزارت په وینا، عملي چارې یې په چټکۍ سره روانې دي.
