هرات کې د خوراکي توکو د تولید، په دې برخه کې د شته ظرفیتونو معرفي کولو، سیمه ییزو او نړیوالو اقتصادي همکاریو پیاوړتیا او د خوراکي توکو د تولید په برخه کې پانګونې جلبولو په موخه غونډه جوړه شوه.
چارواکي وايي، هرات د خپل ستراتیژیک موقعیت له امله د کورنیو او بهرنیو سوداګرو لپاره په دې برخه کې ښه فرصتونه لري چې بايد ترې ګټه واخیستل شي.
د هرات د خوراکي توکو واردونکو ټولنې رییس محمد زبیر رحیمي وايي: « زموږ د ناستې موخه دا ده چې یو شمېر نوې طرحې، نوښتونه، ابتکارونه او فرصتونه د غذايي موادو په برخه کې رامنځته شوې. همدارنګه په دې اړه په هرات ولایت کې نوي فرصتونه ایجاد شي. دغه ناستې د دې لپاره هم جوړه شوې چې اقتصادي کارپوهان، د اقتصادي خونو او صنایعو مشران ګډ کار وکړي ترڅو زموږ ځوانانو او نوي نسل ته کاري فرصتونه لا ډېر شي.»
په دې ناسته کې د ایران د خراسان رضوي ولایت استازی وایي، د افغانستان او ایران ترمنځ سوداګریزې اړیکې د پرمختګ په حال کې دي او په خبره یې د روان لمریز کال په تېرو ۸ میاشتو کې د دواړو هېوادونو د سوداګرۍ کچه ۱.۶میلیارد ډالرو ته رسېدلې چې د تېر پرتله ۲۰ سلنه زیاتوالی ښيي.
د ایران د خراسان رضوي ولایت د صنعت او کانونو سازمان عمومي مدیر امیر رضا رجبي وايي:« د دواړو هېوادونو ترمنځ د سوداګریزې راکړې ورکړې مخ پر ودې لړۍ له نېکه مرغه چټکه شوې. موږ د روان لمریز کال په ۸ میاشتو کې تقریبا ً ۱.۶ میلیارد ډالره تجارتي راکړه ورکړه لرله چې د تېر کال پرتله ۲۰ سلنه وده ښيي. له دې ډلې د خراسان رضوي برخه له ۳۵ سلنو لوړه ده.»
بله خوا، هرات سوداګر د افغان او ایراني سوداګرو ترمنځ دا ډول ناستې د دواړو هېوادونو د سوداګریزو اړیکو پیاوړتیا لپاره مهمې بولي او پر زیاتوالي یې تینګار کوي.
د افغان زعفران کارانو ټولنې رییس محمد ابراهیم عادل وايي: « د سوداګرۍ خونې مشرتابه پلاوی د هغه پروګرام له جوړېدو مننه کوي چې د خوراکي توکو ټولنې له خوا جوړ شوی و. د ایران او افغانستان ترمنځ دغه ډول ناستې ډېرې اغېزناکې دي او د خوراکي توکو اهمیت ښيي.»
په ورته وخت کې، د هرات سیمه ییز چارواکي د کورنیو تولیداتو د تولید او صادراتو په برخه کې د پانګونې هرکلی کوي او ډاډ ورکوي چې د سرپرست حکومت پر ملاتړ به کورنیو او بهرنیو سوداګرو ته د پانګونې لپاره زیات فرصتونه برابر شي.
د هرات د صنعت او سوداګرۍ خونې رییس بشیر محمد سیرت وايي: « اسلامي امارت د پانګونې جلبولو لپاره زیار او محنت کاږي او دا چې څنګه کولی شو د خپلو پانګوالو لپاره د افغانستان په داخل کې په یوه بهترین فرصت کې د پانګه اچونې زمینه جوړه کړو، ترڅو وتوانېږو د افغانستان په داخل کې د خپلو تولیداتو او د هغو د صادراتو ظرفیت لوړ کړو.»
دغه ناسته په داسې حال کې ترسره کېږي چې هرات کې د خوراکي توکو د تولید صنعت د پرمختګ په حال کې دی او دا مهال یوازې په هرات صنعتي ښارګوټي کې تر۲۰۰ زیاتې کارخونې د خوراکي توکو د تولید په برخه کې فعالیت لري.
