د هرات ولایت پښتون زرغون ولسوالۍ تودې سیمه کې د اوسپنې کان لومړنۍ اکتشافي او جیوفیزیکي چارې بشپړې شوې او په پام کې ده چې له یوه کال کمه موده کې یې د استخراج چارې هم پیل شي.
ځايي مسوولین وايي، یاد کان ۱۷ کیلومټره ساحه لري او د اوسپنې زېرمه یې ۷ میلیونه ټنه اټکل شوې ده.
د پښتون زرغون اوسپنې کان اجراییه آمر حامد سیرت وايي: « په لومړي پړاو کې لومړنۍ څېړنې دي چې په کې جیولوژيکي څېړنې، توفوګرافي مطالعات، د نقشه بردارۍ او هوايي څېړنې شاملې دي. ورپسې جیوفزیکي څېړنې دي چې تر دې دمه ترسره شوې دي. د جیوفزیکي څېړنو له مخې اټکل شوی چې باید په ۶۰ ټکو کې کیندنې ترسره کړو.»
یاد کان د ۱۴۲ میلیونو ډالرو په ارزښت د ۳۰ کلونو لپاره په قرارداد ورکړل شوی.
د قراردادي شرکت مسوولان وایي، هوډ لري چې د اوسپنې د استخراج پروسې له پیل وروسته، د اوسپنې ویلي کولو کارخونه هم جوړه کړي، ترڅو په هېواد کې فولاد تولید او داخلي بازارونو ترڅنګ يې بهرنيو بازارونو ته هم صادر کړي.
د قراردادي شرکت رییس غلام قادر صدیقي وايي: « د اسلامي امارت د کانونو او پټرولیم وزارت ته زموږ له خوا وړاندې شوي پروپوزل له مخې، ۱۲۴ میلیونه او ۵۰۰ زره امریکايي ډالر د ۳۰ کالو په اوږدو کې پانګونه کېږي.»
چارواکي وايي، اوسمهال په هرات کې شاوخوا ۶۰ کانونه شته چې ډېری هغه یې د اکتشاف او یا استخراج په حال کې دي او په کې زرګونه کسان پر کار بوخت دي.
د اطلاعاتو او فرهنګ وزارت د خپرونو معین حیات الله مهاجر فراهي وايي: « اسلامي امارت او په ځانګړې توګه د کانونو او پټرولیم وزارت تر ډېره قراردادي شرکتونو ته اړینې اسانتیاوې برابروي. هرڅوک کولی شي راشي او په خپل هېواد کې پانګونه وکړي، هم اجر او ثواب او هم پيسې وګټي.»
د هرات د کانونو او پټرولیم رییس فضل احمد منیب وايي: « په عمومي توګه په هرات ولایت کې د مرمر ډبرو، رخام ډبرو، ډبرو سکرو، مسو، سربو، مالګې او ساختماني موادو تقریبا ً له ۶۰ زیات فعال او غیر فعال کانونه شته دي.»
د چارواکو په خبره، د اوسپنې د دې کان ۵۰ سلنه اوسپنه خالص ده او دا مهال په کې د اکشتافي چارو تر ۱۰۰ زیات اړوند کسان پر کار بوخت دي او د استخراج چارو له پیل سره به د بوختو کسانو شمېر ۱۵۰۰ کسانو ته لوړ شي.
