پاکستاني رسنیو راپور ورکړی چې د دې هېواد پخواني لومړي وزیر عمران خان زرګونه پلویان او د تحریک انصاف ګوند غړي له زندان د نوموړي خوشې کېدو او عدالت پلي کېدو په موخه له دوو ورځو سختو ننګونو وروسته پلازمېنې اسلام آباد ته رسېدلي دي.
د دې ګوند د رهبرۍ غړیو او پلویانو ادعا کړې چې اسلام آباد ته پر لاره او دې ښار ته له داخلېدو سره یې پولیسو د اعتراض مخه نیولې او د دې ګوند يو شمېر پلويان یې وژلي هم دي.
له دې سره، د پاکستان کورنیو چارو وزیر محسن نقوي ویلي، د لاریون کوونکو او پولیسو ترمنځ شخړو کې لسګونه پولیسو ته هم مرګ ژوبله اوښتې.
د نقوي په خبره، د لاریون کوونکو مخنیوي لپاره پوليسو ربړي مرمۍ او اوښکې بهوونکی ګاز کارولی.
هغه په دې اړه وايي: « د مرمۍ ځواب په مرمۍ اسان و، خو پولیسو د لاریون کوونکو د مخنیوي لپاره له ربړي مرمیو او اوښکې بهوونکي ګاز کار اخیستی او هر څوک چې دې چوک ته د داخلېدو هڅه وکړي، وبه نیول شي او بېرته تلل به يې ستونزمن شي.»
په ورته مهال، د امریکا د بهرنیو چارو وزارت د عمران خان له پلویانو غوښتي چې په سوله یيزه توګه لاریونونو ته ادامه ورکړي او له تاوتریخوالي ډډه وکړي.
د دې وزارت ویاند د پاکستان له حکومت هم غوښتي چې د لاریونونو پر مهال د خلکو بشري حقونه او بنسټیزې آزادۍ له پامه ونه غورځوي.
د امریکا بهرنیو چارو وزارت ویاند متیو مېلر وايي: « موږ په پاکستان او ټوله نړۍ کې د بیان آزادۍ او د سوله ييزو راټولېدنو ملاتړ کوو. موږ پر لاریون کوونکو غږ کوو چې سوله ییز لاریونونه وکړي او له تاوتریخوالي دې ډډه وکړي.»
په اسلام آباد کې دغه لاريونونه داسې مهال ترسره کېږي چې تازه د بېلاروس ولسمشر اليکساندر لوکاشينکا له پاکستان سره د دوه اړخیزو اقتصادي همکاریو په موخه اسلامآباد ته رسېدلی.
پاکستاني رسنیو ویلي، حکومت د لاریون کوونکو د مهارولو لپاره د پوځيانو په ګډون زرګونه پولیس په اسلام آباد کې ځای پر ځای کړي دي.
آزاد خبریالان وايي، د تحریک انصاف ګوند موسس او پخواني لومړي وزیر عمران خان پلویان له زندان د نوموړي خوشې کولو ترڅنګ، په ټاکنو کې د درغلیو د څېړلو غوښتنه هم لري.
خبریال طاهرخان وايي: « که څه هم حکومت اعلان کړی و چې دوی به د دغو لاریونونو مخه نیسي، خو د لاریون کوونکو شمېر ته په کتو داسې ښکاري چې حکومت ته به دا یوه لویه ننګونه او چلېنج وي چې د دوی مخه ونیسي. دلته امنیتي سرچینو ادعا کړې چې د پي.ټي.آی د یوه کارکوونکي له خوا له رینجر نیمه پوځي کسانو سره ټکر شوی او درې تنه نیمه پوځي کسان په کې مړه شوي دي.»
د دوشنبې په ورځ(د ۲۰۲۴ کال د نومبر ۲۵) اسلام آباد ته د لاریون کوونکو له ورتګ سره سم، د پاکستان یو شمېر دولتي ادارې بندې شوې او ورسره په دې هېواد کې د افغانستان سفارت هم د لنډ مهال لپاره خپل فعالیتونه وځنډول، خو د بیا پیل خبر یې نه دی ورکړل شوی.
