واک ته د اسلامي امارت له بیا ځل رسېدو وروسته، په ځلونو له بهر مېشتو افغان پانګوالو غوښتل شوي چې د امنیت ټينګښت ته په کتو، راشي او په هېواد کې په بېلابېلو برخو کې پانګونه وکړي.
تازه په لندن کې د مېشت افغان پانګه وال له لوري کابل کې د ۲ میلیونه ډالرو په ارزښت سړې خونې جوړې او ګټې اخیستنې ته وسپارل شوې.
د جوړو شویو سړو خونو د مراقبت رییس ذبیح الله وايي: « زموږ د دې سړې خونې د تودوخې درجه مثبت یوه درجه برابره شوې او د ټول سیسټم لپاره خورا دقیق پروګرام جوړ شوی او له نړیوالو ستندردونو سره سمون لري. موږ د سړې خونې په داخل کې هره ورځ دوه ځلې ټولې اېښودل شوې ټوکرۍ چیک کوو او زموږ کاري ټیمونه تل د مراقبت په حال کې دي.»
دغه سړې خونې چې اوس مهال ۳ زره ټنه مڼې په کې اېښودل شوې دي، مسوولین یې وایي، موخه یې د هغو مېوو له خرابېدو مخنیوی دی چې د موسم پر را رسېدو سره تر ډېره خپل ارزښت له لاسه ورکوي.
پانګه وال حبیب جمال زوی وايي: « ما وغوښتل چې راشم او خپل وطن ته خدمت وکړم. زموږ ارادې او نیتونه پاک دي او پلان لرم چې راتلونکی کال ۳ میلیونه ډالره نور هم پانګونه وکړم. له بده مرغه هر کله چې زموږ د مېوو فصل ورسېږي، ګاونډیان خپلې دروازې بندې کړي او زموږ مېوې خرابې شي. له همدې امله زموږ ولس او اقتصاد له ستونزو سره مخ دي. همدارنګه، زموږ تازه مېوې او سبزیجات ځي ګاونډیو هېوادونو ته او هلته سټور کېږي، خو بیا بېرته راځي او په موږ یې پر لوړه بیه خرڅوي.»
په ورته مهال، د سوداګرۍ او پانګونې خونې مسوولین د سړو خونو اړتیا ته په کتو، له دغې پانګونې هرکلی کوي خو ترڅنګ یې غوښتنه کوي چې د ټاکلې مودې له ساتنې وروسته دې ساتل شوې مېوې پر لوړه بیه نه پلورل کېږي.
د سوداګرۍ او پانګونې خونې د سوداګرۍ څانګې مرستيال عبدالجلیل وايي: « همدا چې امنیت وي، پانګوال پانګونه کوي. زه له حاجي صاحب حبیب مننه کوم چې خپله پانګه یې له لندن را انتقال کړه او دلته یې پانګونه وکړه. په راتلونکي کې هم توقع لرو چې خپله دی، همکاران او ملګري یې او دغه راز د نړۍ په هر هېواد کې زموږ هېوادوال راشي او دلته پانګونه وکړي، خلکو ته کار ایجاد کړي ترڅو د ځوانانو او له وتلو څ مخنیوی وشي.»
دا سړې خونې په داسې مهال جوړېږي چې د سړو خونو نه شتون له کبله د افغانستان تازه مېوې د ګاونډیو هېوادونو له خوا په سړو خونو کې ساتل کېږي او بیا د اړتیا پرمهال بېرته پر لوړه بیه پر افغانستان پلورل کېږي.
