د جرمونو نړيوالې محکمې له لوري د دویم ځل لپاره د اسراییلو لومړي وزیر او پخواني دفاع وزیر د نیولو پرېکړه د فلسطین په ګډون د نړۍ د ګڼو هېوادونو له تاوده هرکلي سره مخامخ شوې.
محکمې د اسراییلو لومړی وزیر بنیامین نتنیاهو او پخوانی دفاع وزیر یواف ګالانټ په غزې او لبنان کې یې پر جنګي جنایتونو او بشري ناورین رامنځته کولو تورن کړي.
د اسراییلو لومړي وزیر د یادې محکمې پرېکړه غندلې او زیاته کړې یې ده چې د خپل هېواد او وګړو د خوندیتوب لپاره به په سیمه کې د هر ډول ګواښونو مخنیوی وکړي.
بنیامین نتنیاهو زیاته کړې: « دې محکمې د هغو ډیکټاټورانو له خوا پر جنګي جنایتونو هېڅ غبرګون ونه ښود چې میلیونونه خلک یې له لاسه په ایران، یمن او سوریه کې ووژل شول. موږ به د خپل هېواد او خلکو د خوندیتوب لپاره هغه څه وکړو چې اړتیا یې ده. موږ به ایران او د ایران ملاتړې ډلې پرېنږدو چې زموږ پر وړاندې ګواښ رامنځته کړي.»
خو د جرمونو نړیوالې محکمې پرېکړې ته د نړۍ د یو شمېر هېوادونو مشرانو بېلا بېل غبرګونونه ښودلي.
د امریکا ولسمشر جوبایډن چې په غزه او لبنان کې یې له اسراییلو سره د واشنګټن د پوځي ملاتړ پر دوام تل ټینګار کړی، د جرمونو د نړیوالې محکمې یادې پرېکړې ته په غبرګون کې ویلي، اسراییلي مشران له حماس ډلې سره نه شي پرتله کېدای او امریکا به د اسراییلو پوځي ملاتړ ونه دروي.
بایډن زیاته کړې:« د اسراییلو او حماس ترمنځ یو شان والی وجود نه لري. موږ به د هغو ټولو نا امنیو پر وړاندې د اسراییلو ملاتړ وکړو چې دغه هېواد ته ګواښ پېښولی شي.»
په ورته مهال، استرالیا، کاناډا او د اروپايي ټولنې یو شمېر غړیو هېوادونو د اسراییلو لومړي وزیر په اړه د جرمونو نړیوالې محکمې له پرېکړې هرکلی کړی او له نړیوالې ټولنې یې غوښتنې چې د محکمې پریکړو ته درناوی وکړي.
د کاناډا لومړي وزیر جسټین ټروډو ویلي:« موږ د نړیوالو قوانینو ملاتړ کوو او د نړیوالو محاکمو ټول مقررات او حکمونه منو.»
د دې ترڅنګ، د اروپايي ټولنې د بهرنیو پالیسو مشر جوزیف بورېل هم د محکمې د پرېکړې پلي کېدو او درناوي غوښتنه کړې.
د جرمونو نړیوالې محکمې د حماس اسلامي غورځنګ د يوه پوځي قوماندان محمد دياب ابراهيم المصري چې په محمد ضيف مشهور دی، د نيولو امر هم صادر کړی.
د محمد ضیف د نیولو امر داسې مهال صادر شوی چې اسراییلو څو میاشتې وړاندې په غزه کې د نومړي د وژلو ادعا کړې وه.
اسراييلي ځواکونو د ۲۰۲۳ زېږدیز کال په اکټوبر کې پرغزې تړانګې هوايي او ځمکني بریدونه پیل کړل چې تر اوسه په کې شاوخوا ۴۴ زره فلسطینانو خپل ژوند له لا سه ورکړی او له ۱۰۰ زره زیات ژوبل شوي دي.
د فلسطین د روغتیا وزارت د مالوماتو له مخې، د یادې مرګ ژوبلې ۷۰ سلنه ښځې او ماشومان دي.
