د کانونو او پټرولیم وزارت، اداري اصلاحاتو او ملکي خدمتونو ادارې ترمنځ د اداري پروسې ساده کولو هوکړه لاسلیک شوه.
د کانونو او پټرولیم وزارت سرپرست وايي، د دې هوکړې له مخې به په کانونو کې د پانګونې په برخه کې یو لړ پروسې ساده شي.
هدایت الله بدري وايي، د لوی مقیاس کانونو په برخه کې به له دې وړاندې پانګوال له ۲۲۸ مراحلو تېرېدل، خو اوس دغه پروسه ساده شوې او یوازې ۹۵ پړاونو ته راټیټه شوې.
د بدري په خبره، په کوچني مقیاس کانونو کې هم د پانګوالو لپاره پروسه ساده شوې او اوس مهال ۱۱۱ پړاوونه ترې کم شوي دي.
هغه په دې اړه وايي:« له دې مخکې پانګوالو د پانګونې لپاره د لوی مقیاس کانونو په برخه کې ۲۲۸ قدمونه او د کوچني مقیاس کانونو په برخه کې ۱۷۸ قدمونه طی مراحل کول. له نېکه مرغه د کانونو او پټرولیم وزارت او د اداري اصلاحاتو او ملکي خدمتونو ادارې د ګډو هڅو په پایله کې د لوی مقیاس کانونو ۲۲۸ قدمونه ۹۵ قدمونو ته او د کوچني مقیاس کانونو ۱۷۸ قدومه ۶۷ قدمونو ته راټیټ کړل. د یادونې وړ ده چې د لوی مقیاس کانونو په برخه کې ۱۳۳ قدمونه او د کوچني مقیاس کانونو په برخه کې ۱۱۱ قدمونه حذف شول.»
د اداري اصلاحاتو او ملکي خدمتونو اداره وايي، تر اوسه یې په ګڼ شمېر وزارتونو کې د چارو د ساده کولو پروسه تطبیق کړې او څه باندې ۷۰۰ پروسې یې ساده کړې دي.
د دغې ادارې سرپرست شهزاده نور راشد په خبره، له دې کار سره تر ډېره د خلکو ستونزې حل او چارې ګړندۍ شوې دي.
راشد زیاتوي:« د ساده سازۍ برخه د نظام په سطح، کله چې اسلامي امارت په دې خاوره حاکم شوی، تر اوسه تقریبا ً په لسو وزارتونو او ادارو کې ۷۰۸ پروسې ساده کړې دي.»
د چارو د ساده کولو پروسه د ولسي باور رامنځته کولو لپاره ګټوره بلل کېږي.
د چارو ادارې سرپرست نور الحق انور وايي، له دې سره د چارو د معیاري کېدو ترڅنګ روڼتیا او شفافیت هم رامنځته کېږي.
انور په دې اړه وايي:« د چارو د ساده سازۍ پروسې د تتمیم او اختتام په سلسله کې دا یقینا ً ښه قدم دی چې اخیستل شوی. د شفافیت، معیاریتوب او باور زیاتېدو او خلکو ته د ښو خدماتو وړاندې کولو په لور لوی پرمختګ دی. دا نظام ته هم په ګټه دی او هېوادوالو ته هم.»
د اداري اصلاحاتو او ملکي خدمتونو ادارې له لوري د چارو ساده کولو پروسه د پوهنې او عامې روغتیا وزارتونو، ښاروالۍ او ګڼ شمېر نورو حکومتي ادارو کې روانه ده چې موخه یې هم د چارو ساده کول او خلکو ته اسانتیاوو برابرول، بلل شوې ده.
