د پخوانیو کارخونو او تولیدي ځایونو د بیا فعالولو په لړ کې دا ځل د بلخ ولایت سېلو له لسیزو وروسته یو ځل بیا د غنمو په زېرمه کولو پیل کړی.
د دې تصدۍ مسوولین باور لري چې روان کال به تر۳ زره مټریک ټنو غنم راټول او زېرمه کړي.
د بلخ سیلو رییس عبدالباري نصرت وايي: « د بلخ سیلو له بیا رغولو او فعالولو وروسته د امیرالمؤمین له خوا د ۳ زره ۳۶ ټنو غنمو زېرمه کول منظور شوي او دا مهال نیږدې ۱ زره ۵۰۰ ټنه غنم زېرمه شوي او پاتې نور هم په لارو دي.»
د بلخ سيلو د غنمو پېرلو مسوول شېرعلي وايي: « موږ باید خپل غنم په لومړي سره کې له بزګرانو واخلو، ترڅو زموږ له خوا د غنمو له پېرلو وروسته وهڅول شي چې په راتلونکي کې لا زیات غنم وکري او ونه وايي چې د غنمو بیه په بازار کې ټیټه ده. موږ دا غنم د بازار له نرخ ۳۰ تر ۴۰ افغانیو پورته اخلو او دغه راز د ټرانسپورټ، جیوالي، باروونکو او تلې لګښتونه هم ورکول کېږي. خلاصه د بزګرانو ټول اضافي لګښتونه د غنمو په اصلي بیه ور اچوو او بیا یې حسابوو.»
د غنمو زېرمه کول، معاینات خونه او د ډوډۍ پخول بیا د بلخ سیلو له اساسي دندو دي.
د چارواکو په خبره، هره ورځ په دې سیلو کې ۳ زره ډوډۍ پخېږي او په مزار شريف کې دولتي روغتون ته وېشل کېږي.
د بلخ سیلو یوتن کارکوونکی وايي: « روغتونونو ته ډوډۍ خپله د سیلو د خدماتي څانګې له خوا استول کېږي. زموږ ډوډۍ سل په سلو کې پاکه او با کیفیته ډوډۍ ده، همدارنګه د داش ډوډۍ ده، نه د تناره، ځکه نو ډېره پاکه او ښه کیفیت لري.»
بل پلو، د کرنې، اوبولګولو او مالدارۍ وزارت چارواکی وايي، د بلخ سیلو کې د غنمو زېرمه کولو څخه موخه په راتلونکي کې د غنمو د لوړو بیو او احتکار د مخنیوي ترڅنګ، په کوردننه د غنمو زېرمه کول دي.
د دغه وزارت استازی راشد ځاځی وايي: « دا د خوښۍ ځای دی چې مزارشریف کې سیلو شته او د اسلامي امارت په بیا ځل راتګ سره یې خپل فعالیت بېرته پيل کړ. دلته له کروندګرو، دوکاندارانو او سوداګرو غنم راځي او په دې سیلو کې زېرمه کېږي. دغه کار د بیو له لوړېدو او احتکار د مخنیوي لپاره کېږي او دغه راز که چېرې خلک له طبیعي پېښو سره مخامخ کېږي، دغه غنم د کرنې وزارت له خوا په وړیا ډول دوی ته وېشل کېږي.»
د بلخ سېلو په ۱۳۶۲ لمریز کال جوړه شوه، خو د څو لسیزو جګړو پرمهال د نه پاملرنې او امکاناتو کموالي له امله اوږده موده له فعالیت لوېدلې وه.
دا مهال دوه کاله کېږي چې یادې سیلو یوځل بیا پر فعالیت پیل کړی او ورسره سم لسګونه کسانو ته په کې د کار زمینه هم برابره شوې ده.
