د امريکا نوي ټاکل شوي ولسمشر ډونالډ ټرمپ د خپلې کابينې د غړیو نومولو په لړ کې تازه د بهرنيو چارو وزارت لپاره مارکو روبيو او د ملي امنيت سلاکار په توګه مایکل والتز نوماند کړي دي.
ډګروال مايکل والتز د بارک اوباما ادارې پرمهال د امريکا د ځانګړو ځواکونو په چوکاټ کې په افغانستان کې ماموريت ترسره کړی او وروسته له هغې چې په استازو جرګې کې د فلوريډا ايالت استازی شو، د افغانستان اړوند قضيو په تړاو يې خاص دريځ خپل کړ.
نوموړی له افغانستانه د امريکايي او بهرنيو ځواکونو د وتلو منتقد پاتې شوی او له همدې کبله يې په استازو جرګې کې د استجواب پرمهال د امريکا پر پخوانيو نظامي چارواکو توندې نيوکې وکړې.
کارپوهان د ملي امنيت سلاکارۍ ته د نوموړي نومولو موخه که څه په منځني ختيځ او اوکراين کې د جګړې مديريت بولي، خو د افغانستان لپاره يې هم له پيغام تش نه ګڼي.
د سیاسي چارو شنونکی اسدالله نديم وايي: « د ټرمپ په راتلونکي حکومت کې د ملي امنیت د سلاکار په توګه د هغه انتصاب ښايي د افغانستان پر مسایلو هم اغېز ولري. دا سړی په افغانستان کې جنګي تجربه لري او زموږ د اوسني حکومت په اړه خوشبینانه لیدلوری نه لري.»
مايکل والتز په منځني ختيځ او افرېقا کې هم د نظامي په توګه ماموريتونه ترسره کړې، خو په افغانستان کې د نستباً اوږد ماموريت له امله، د افغان جګړې ماهر ګڼل کېږي.
ځيني کارپوهان د نوموړي دې کريکټر ته په کتو وايي، په افغانستان کې د امريکا نظامي حضور په صفر کېدو سربېره هم، ډونالډ ټرمپ ته افغانستان مهم دی او له همدې کبله پر هغو دولتي موقفونو چې د امريکا په جيوفالېټيکس کې يې رول زیات دی، د افغانستان له مسايلو سره بلد کسان ګوماري.
د نظامي چارو کارپوه عبدالواحد طاقت وايي: « دا کس افغانستان کې پاتې شوی او ډېر بلد دی. اوس چې د ملي امنیت د سلاکار په حیث ټاکل شوی او خلیلزاد هم مبارکي ورکړې، ښکاري چې افغانستان د ټرمپ لپاره ډېر حساس او مهم دی.»
ځينې نور بيا د ټرمپ دغې پرېکړې ته له بلې زاويې ګوري او وايي، د والټز نومونه په نورې نړۍ کې د جګړې پر مديريت، خو ښايي له افغانستان سره برعکس د همکاريو د یوه نوي چینل پر پرانيستلو تمرکز ولري.
د سیاسي چارو شنونکی اسلم دانشمل وايي: « د ټرمپ په راتګ سره په دې سیمه کې یوځل بیا د یوې ډېرې قوي ډيپلوماسۍ د پيل احتمال شته. ښايي ټرمپ وغواړي له اسلامي امارت سره د ډيپلوماټیکو چینلونو له لارې مخکې لاړ شي او د دوحې تړون د ټولو مادو د تطبیق لپاره له یو بل سره مذکرات وکړي.»
د افغانستان له وضعيت باخبره مايک والټز ګومارنه د امريکا د جمهوري غوښتونکو ګوند د مطرحو څېرو له هرکلي سره مخ شوې او له دې ډلې د افغانستان سولې لپاره د ياد هېواد پخواني ځانګړي استازي زلمي خليلزاد هم د ملي امنيت سلاکار په توګه د والټز نومول پر ځای پرېکړه بللې.
