د لغمان ولایت د قرغیو ولسوالۍ کې د غالۍ اوبدلو یوې کارخانې مالکه بس بي بي وايي، په دوو کاري شیفټونو کې یې ۳۰ تنو ښځو ته د کار زمینه برابره کړې او په غالۍ اوبدلو بوختې دي.
د بس بي بي په خبره، که ملاتړ یې وشي نو کارونه به یې لا وغوړېږي او ډېرو نورو ښځو ته به هم د کار کولو زمینه برابره کړي.
هغه په دې اړه وايي: « ۳۰ تنې ښځې او نجونې دي او دلته کار کوي. دا ښځې او نجونې وايي، دلته ترلاسه کېدونکو پیسو یې اړتیاوې نه پوره کېږي. زه کوشش کوم داسې موسسه یا اداره پيدا کړم چې موږ ته معاش راکړي او موږ ورته کار وکړو، ترڅو هم زموږ کار وشي او هم د دوی.»
په دغه کارخونه کې پر کار بوختې ښځې وايي، خوښې دي چې د خپل لاس په کړې خوارۍ کورنۍ ته پيسې ګټي، خو ټینګار کوي چې سرپرست حکومت باید دوی ته د کاري زمینو له زیاتولو سربېره د دوی د عصري زده کړو لپاره هم زمینه برابرې کړي.
یوه غالۍ اوبدونکې ښځه وايي: « ۳۰ تنې دلته کار کوو، ۱۵ له غرمې وړاندې او ۱۵ له غرمې وروسته. ۵۰ تنې نورې ښځې هم په خپلو کورونو کې کار کوي. موږ له موسسو او اسلامي امارت غوښتنه کوو چې موږ ته د کار نورې زمینې هم برابرې کړي؛ ځکه په دغو پيسو زموږ ګوزاره نه کېږي چې دلته یې راکوي.»
یوه بله غالۍ اوبدونکې نجلۍ له اسلامي امارت د زده کړو غوښتنه کوي او وايي: « زموږ ښوونځي تړل شوي، له اسلامي امارت غوښتنه کوو چې موږ ته د زده کړو اجازه راکړي. موږ کولی شو نیمه ورځ درس ووایو او نیمه ورځ بیا کار وکړو.»
بله خوا، د لغمان ځايي چارواکي وايي، اوسمهال د دغه ولایت په بېلابېلو ولسوالیو کې سلګونه ښځو ته د دوی په کورونو کې کاري زمینې برابرې شوې چې ډېری یې پرغالۍ اوبدلو، خیاطۍ او لاسي صنایعو پر جوړولو بوختې دي.
د لغمان د اقتصاد رییس مولوي جان محمد حامد وايي: « نیږدې سلګونه ښځو لپاره مو پروګرامونه په کار اچولي چې په دې کې د غالۍ اوبدل دي، د وړیو ورېشنلو مرکزونه دي، د خیاطۍ پروګرامونه، حرفوي زده کړې، لاسي صنایع جوړول او ځینې نور پروګرامونه په کې شامل دي.»
د مالوماتو پر بنسټ، لغمان کې د ښځو په لاس جوړ شوي بېلابېل توکي د ښه کیفیت لرونکي دي او د بازار موندنې په برخه کې یې هم بېلابېل نندارتونونه جوړ شوي دي.
