د روانې اکټوبر میاشتې پر ۲۰مه د قزاقستان په الماتي ښار کې د افغان- قزاق تر نامه لاندې ګډ سوداګریز نندارتون پيل شو.
د دې نندارتون د پرانيستې لپاره د صنعت او سوداګرۍ وزارت سرپرست پر مشرۍ پلاوی د شنبې په ورځ پلازمېنې آستانې ته ورسېد.
د دغه وزارت ویاند اخوندزاده عبدالسلام جواد وايي، په دې دوه ورځني نندارتون کې د افغان سوداګرو لپاره ۸۰ غرفې ځانګړې شوې چې په کې به ۶۹ افغان شرکتونه خپل تولیدات نندارې ته وړاندې کړي.
د جواد په خبره، د افغاني شرکتونو له لوري نندارې ته په اېښودل شویو توکو کې غالۍ، زعفراڼ، وچه مېوه، جواهرات، قېمتي او نیمه قېمتي ډبرې شاملې دي.
هغه زیاتوي: « په دې نندارتون کې ۸۰ غرفې او ۶۹ شرکتونه افغانستان څخه ګډون کوي چې د غالیو، وچې مېوې، زعفرانو، قېمتي او نیمه قېمتي ډبرو او جواهراتو په ګډون به خپل محصولات او تولیدات نندارې ته وړاندې کړي.»
افغان سوداګر دغه ډول نندارتونونه د بازار موندنې په برخه کې ګټور بولي او زیاتوي چې د ورته ګډو نندارتونونو په جوړولو سره د هېوادونو ترمنځ سوداګريزې اړيکې پراختيا مومي.
سوداګرعبدلجبار ساپی وايي: «نندارتونونه په ملي او نړیواله سطحه د افغانستان پر تولید او تجارت مثبت تاثیر کوي. څنګه کولی شو خپل تولیدات په ملي سطحه خلکو د نندارتونونو له خوا وښیو او خلک تشویق کړو چې له خپلو داخلي تولیداتو استفاده وکړي.»
په ورته مهال، د اقتصادي چارو کارپوهان هم په دې باور دي چې په بهر کې کورنيو محصولاتو ته د بازار موندنې لپاره د نندارتونونو جوړول د اقتصادي پياوړتيا په برخه کې مهم تمامېدای شي.
دوی زیاتوي، د ورته نندارتونونو په جوړولو سره کورنيو محصولاتو ته له بازار موندنې سربېره، بهرني سوداګر هم په افغانستان کې پانګونې ته هڅول کېدی شي.
د اقتصادي چارو کارپوه نورالله عزیز وايي: « نندارتونونه په اقتصادي لحاظ باندې ډېر مهم او اړین دي. دا نه یوازې دا چې د تولیداتو د زیاتوالي لامل ګرځي، بلکې کولی شي د تجارت د پرمختګ او د هېوادونو ترمنځ د اړیکو د رغولو لپاره هم یوه ښه وسیله وبللی شي. د تجارتي خونو د زیاتوالي او د دغو خونو د تشویق په بنا باندې موږ کولی شو کوچنۍ پانګونې وهڅوو، ترڅنګ یې منځنیو پانګونو ته وسعت ورکړو او لویو پانګونو ته زمینه برابره کړو.»
د صنعت او سوداګرۍ وزات سرپرست پر مشرۍ قراقستان ته تللي پلاوي له خارګوس بندر هم لېدنه کړې.
د مالوماتو پر بنسټ، دغه بندر په وچه کې د نړۍ تر ټولو لوی بندر ګڼل کېږي چې د چین او قزاقستان پر ګډه پوله پروت دی.
