په کابل کې د امام ابوحنیفه ملي او نړيوال نندارتون کې د بېلابېلو هېوادونو سوداګرو هم ګډون کړی او د خپلو هېوادونو صنعتي توکي یې نندارې ته وړاندې کړي.
د نندارتون یو شمېر ایراني ګډون کوونکي او سوداګر وایي، که د سرپرست حکومت له لوري ورته د پانګونې په برخه کې اسانتیاوې برابرې شي، چمتو دي چې په افغانستان کې پانګونه وکړي.
دوی وایي، په افغانستان کې د پخوا پرتله پانګونې ته تر ډېره زمینه برابره شوې او په خبره یې افغانستان کې اړتیا ته په کتو په بېلابېلو برخو کې د پانګونې هوډ لري.
د نندارتون ایرانی ګډونوال مرتضی کبیري وايي: « موږ دا ذهنیت نه درلود چې افغانستان کې به په دومره ښه کیفیت کار کېږي؛ دلته په راتګ مو ولیدل چې کیفیت خورا لوړ دی، د افغانستان خلک ډېر مېلمه پال محترم دي. هو! موږ حتمن افغانستان کې پانګونه کوو، خو د یوه ښه شریک په لټه کې یو. د امنیت په اړه باید ووایم چې دلته اقتصادي او ټولنیز امنیت په بشپړه توګه تأمین دی. ایران ته له ستنېدو وروسته به خپلو هېوادوالو او پانګولو ته سپارښتنه وکړم چې یوځل حتمن له افغانستانه لیدنه وکړي؛ ځکه چې افغانستان د پانګونې لپاره ډېر مناسب هېواد دی.»
په امام ابوحنیفه نندارتون کې ډېر وطني تولیدات هم نندارې ته اېښودل شوي چې د پخوا په پرتله یې سږ کال د پلور کچه لوړه ښکاري.
د مرکز ګرمۍ مجهز سیسټمونه، بوټان، جامې، وچه مېوه، زعفران، بېټرۍ او نور بېلابېل توکي هغه څه دي چې په دې نندارتون کې یې د لیدونکو پام ځانته اړولی.
د نندارتون کتونکی محمد جاوېد نجم وايي: « په هېواد کې د دې ډول نندارتونونو جوړول د اقتصادي ثبات لپاره خورا ګټور دي. موږ وکتل چې د بېلابېلو کورنیو شرکتونو په وسیله تولید شوي توکي نندارې ته وړاندې شوي. باید د ملي تولیداتو د ودې لپاره نور پروګرامونه هم په لاره واچول شي ترڅو ورسره اقتصادي ثبات پياوړی شي.»
بله خوا، د نندارتون یو شمېر ښځینه ګډونوالې وایي، د تېر پرتله یې په لاس جوړ کړي توکي ښه بازار لري.
دوی غوښتنه کوي چې په نندارتونونو کې له ګډون سربېره، باید ښځو ته په هغو ځایونو کې د کار کولو اجازه ورکړل شي چې په کې ښځينه کارکوونکو ته اړتیا وي.
دوی له سرپرست حکومته غواړي چې له شپږم ټولګي پورته د نجونو پر مخ د ښوونځیو او پوهنتونونو دروازې پرانیزي؛ ترڅو د زده کړو له لارې په بېلابېلو برخو کې خپله وړتیا وښیي.
د نندارتون ګدونواله ثریا محمدي وايي: « ویلی شم چې له پرون راهیسې زموږ فروشات ډېر ښه دي او موږ له خپل خرڅون راضي یو. زموږ ډېری هېوادوال زموږ توکي خوښوي او ملاتړ مو کوي.»
د نندارتون یوه بله ګډونواله فېروزه امیني وايي: «موږ روزنې او لوست ته اړتیا لرو. باید فعالیت وکړو هغه هم د خپل هېواد آبادولو لپاره. موږ په نورو هېوادونو کې ډېر شمېر کډوال لرو چې د فقر او بېکارۍ له امله تللي دي. خو که موږ د کار، زده کړو او تحصیل اجازه ولرو، دا به هم زموږ د ځان او هم د ټولنې لپاره ګټه ولري.»
حکومتي چارواکو د نندارتون موخه له وطني تولیداتو ملاتړ، د نړۍ نورو هېوادونو ته د افغانستان جوړ تولیداتو لېږد او د پانګونې جلب بولي.
که څه هم ایراني سوداګرو په افغانستان کې پانګونې ته زړه ښه کړی، خو دا به د نندارتون په پای کې په ډاګه شي چې آیا سرپرست حکومت د اسانتیاوو برابرولو جوګه دی که نه.
