د تشبث ښوونیزې او روزنیزې موسسې په هېواد کې د کوچنیو تشبثاتو د پرمختګ او پر وړاندې شته خنډونو لرې کولو په موخه د اقتصادي پیاړتیا په نوم ملي کنفرانس جوړ کړی.
د دغې موسسې چارواکي غوښتنه کوي چې خلک او حکومت کورنیو تولیداتو ته لومړیتوب ورکړي ترڅو د هېواد اقتصاد ورسره پیاوړی شي.
همدارنګه، د کوچنیو تشبثاتو او کاروبار لرونکي وايي، حکومت یې باید هغه ستونزې هوارې کړي چې دوی یې د ټرانسپورټ، ځای او د برېښنا انرژۍ په برخه کې لري.
د ننګرهار د متشبثینو استازی نصرالله خادم وايي: « زموږ غوښتنه ده چې د وارداتي توکو پر ځای کورنیو تولیداتو ته ترجېح ورکړل شي. په دې سره سره به متشبیثین په خپلو پښو ودرېږي او د هېواد اقتصاد به ورسره پیاوړی شي. باید له کوچنیو کاروبارونو ملاتړ وشي، مالیات پرې کم شي، دولتي او نادولتي ادارې ترې ملاتړ وکړي.»
همدا راز، دوی پر کوچنیو سوداګریو د مالیاتو کمولو غوښتنه هم کوي او په خبره یې، له دې سره به د دوی ملاتړ وشي او تشبث به یې پرمختګ وکړي.
د بامیانو متشبثینو استازی همایون نوري وايي: «باید پر داخلي تولیداتو مالیات کم شي ترڅو په کور دننه د تولیداتو ودې ته زمینه برابره شي.»
ښځینه متشبثینې په مالي برخو کې د ستونزو لرلو خبره کوي او وايي، هغه ډول چې اړتیا ده ملاتړ یې نه دی شوی.
دوی له مالي ملاتړ سربېره په بهرنیو نندارتونونو کې د ګډون غوښتنه هم کوي او وايي، له دې سره به د دوی تولیدات لا رونق پیدا کړي.
متشبثه هیله مایار وردګ وايي: « زموږ ډېری متشبثانې له مالي ستونزو سره مخامخ دي، لومړی باید زموږ مالي ستونزې هوارې شي. غوښتنه کوو چې په نړیوالو نندارتونونو کې د ګډون زمینه راته برابره شي؛ له دولتي او نا دولتي ادارو غواړو چې زموږ محصولات سپانسر کړي.»
سرپرست حکومت د کوچنیو متشبثینو د ملاتړ ډاډ ورکوي او وايي، هڅه کېږي چې کوچیني تشبثات لاپسې پیاوړي او پراخ شي.
د سوداګرۍ او صنعت وزارت چارواکي وايي، د کوچنیو تشبثاتو د پراختیا او ودې په موخه له ګڼ شمېر کورنیو او بهرنیو بنسټونو او موسسو سره هوکړې لاسلیک شوې او د نورو حکومتي ادارو سره په همغږۍ به د کوچینو تشبثاتو ملاتړ وکړي.
د سوداګرۍ او صنایعو وزارت د کوچنیو تشبثاتو د پراختیا آمر سید آغا دشتي وايي:« د سوداګرۍ او صنعت وزارت له ګڼو تشبثاتو سره د اقتصادي ودې او پراختیا په موخه له کورنیو او بهرنیو انجیوګانو سره تفاهم لیکونه لاسلیک کړي. موږ له نورو دولتي ادارو سره په ګډه هڅه کوو چې کوچني او منځني تشبثات د اسانتیاوو برابرولو له لارې پياوړي کړو.»
کوچني تشبثات د خلکو د ژوند لومړنۍ اړتیاوې پوره کوي او دغه راز د مسلکي او فني کادرونو په روزنه او د سترو صنایعو په وده کې مرسته کوي، هغه هېوادونه چې کوچني تشبثات یې زیات او ځواکمن دي، سترو صنایعو یې هم پرمختګ کړی.
