له تېرې پنجشنبې ورځې راهیسې د خوست ولایت اړوند غلام خان بندر د افغانستان او پاکستاني ځواکونو ترمنځ نیښتو له امله تړل شوی.
سوداګر او د دې لارې موټر چلوونکي وایي، د لارې د بندېدو له کبله میلیونونه افغانۍ تاوان ور اوښتی دی.
د دوی په خبره، د افغانستان او پاکستان حکومتونه دې په فرضي کرښه شته ستونزې د خبرو له لارې هوارې کړي.
د دې لارې یو تن موټر چلوونکي وايي:« په تورخم دروازه کې هم د پاکستان خواته ستونزې شته؛ موږ خپلې لارۍ دلته راوستې خو اوس دلته هم جګړه پيل شوه. درې ورځې کېږي چې لارۍ مو ولاړې دي او په کې بار سبزۍ ټولې خرابې شوې.»
د غلام خان بندر یو بل موټر چلوونکی وايي: « حکومتونه باید ستونزې د خبرو له لارې حل کړي، نه د جګړې له لارې. د خوست – خرلاڅي، غلام او تورخم ټولې لارې بندې دي؛ له مشرانو غوښتنه کوو چې لارې خلاصې کړي.»
همدارنګه بل موټر چلوونکی د اوښتو زیانونو خبره کوي او وايي: «ډېرې لارۍ ولاړې دي چې په کې پیاز، رومي او نوره تازه ترکاري بار ده. د سبزۍ ۱۰۰ تر ۱۵۰ لارۍ دي او په کې بار توکي په خرابېدو دي.»
ورته مهال، د خوست د سوداګرۍ او پانګونې خونې مسوولین وايي، ډېورنډ فرضي کرښې ته څېرمه په بېلابېلو ټکو کې د افغانستان او پاکستاني ځواکونو ترمنځ پېښېدونکو شخړو له امله سوداګر تل میلیونونه افغانۍ تاوان ګالي.
د دوی په خبره، اړتیا ده چې حکومتونه سوداګري د سیاست قرباني نه کړي او شته ستونزې ژر تر ژره هواري کړي.
د خوست سوداګرۍ او پانګونې خونې رییس نواب امیرزی وايي: « که غواړو چې نورمال تجارت وکړو، نو باید تجارت او سیاست سره بېل کړو. حکومتونه باید ستونزې د خبرو له لارې هوارې کړي او تجاران د خپلو سیاستونو قرباني نه کړي.»
بله خوا، سیمه ییز چارواکي وايي، جګړه لومړی د پاکستاني ځواکونو د بد چلن او لفظي ستونزې له امله رامنځته شوې.
دوی زیاتوي، په سیمه کې د وضعیت د ښه والي او لارې د خلاصون په موخه د دواړو حکومتونو ترمنځ خبرې روانې دي.
د خوست اطلاعاتو کولتور رییس شبیر احمد عثماني وايي: « فکر کوم د غلام خان جګړه هم د لفظي شخړې له امله رامنځته شوې. د دې شخړې د هوارولو او تجارتي لاریو د تګ راتګ لپاره مذاکرات پيل شوي او که خدای کول ښه پایله به ولري.»
د خوست ولایت ګربزو ولسوالۍ اړوند غلام خان بندر ته څېرمه پر ډېورنډ فرضي کرښه د وروستیو نښتو له امله د همدې لارې د بندېدو ترڅنګ، ګڼ ځایي خلک هم د خپلو کورونو پرېښودو ته اړ شوي دي.
وروستی ځل نیښته داسې مهال کیږي چې د وږي میاشتې په ۱۵مه د خوست په ځاځي میدان ولسوالۍ اړوند هم پر فرضي کرښه د دواړو خواوو ترمنځ نږدې یوه اوونۍ وقفه یي جګړه روانه وه.
