د ننګرهار کانال شرکت د ترکاڼۍ (نجارۍ) کارخونې مسوولین وايي، په دغه کارخونه کې هره ورځ لسګونه قلمه بېلابېل دفتري توکي او فرنیچر جوړیږي.
دوی زیاتوي، هغه توکي چې په دې کارخانه کې تولید کېږي، خام مواد او لرګي یې ټول د کانال ریاست له اړوند فارمونو ترلاسه کېږي.
د ترکاڼۍ کارخونې مدیر اعوذباالله وزیري په دې اړه وايي:« دلته کوچونه، فرنیچر، تختونه، کوټ بندونه او ګڼ نور اجناس دلته جوړېږي. د دې فابریکې خام مواد موږ له خپلو څلورګونو فارمونو څخه راوړو. دا د شوې په نوم لرګي جوړېږي چې د افغانستان په نورو برخو کې کم پیدا کېږي.»
د دې کارخونې مسوولین او کارګران وايي، اوسمهال د دوی په لاس جوړ شوي مېزونه، څوکۍ او فرنیچر یوازې دولتي ادارو ته لېږل کیږي، خو په خبره یې که نوي ماشینونه ورته واخیستل شي او د بازار موندنې په برخه کې کار وشي، کولی شي ټولو ولایتونو ته خپل تولیدات واستوي.
د کارخونې مدیر اعوذباالله وزیري وايي: « که چېرې د دې کارخونې د ماشینرۍ په برخه کې همکاري وشي او زموږ وسایل معیاري شي، ځکه چې دا شته ماشینري د روسانو د وخت ده او اوس زړه شوې او بل که چېرې له جلا آباد پرته نورو لویو ولایتونو کې نمایندګی پرانیستل شي، دا به هم د دولت، هم کانال او هم ټول افغانستان ته ګټه ورسوي.»
د ترکاڼۍ کارخونې یو تن کارګر ګل احمد وايي: « موږ په دې کارخونه کې ډېرو وسایلو ته اړتیا لرو. له موږ سره داسې وسایل نه شته چې کار په چټکه او لا غوره بڼه ترسره کړو.»
د ننګرهار کانال ریاست د چارواکو په خبره، اوسمهال د دې کارخونې د تولیداتو کچه تر پخوا یو څه لوړه شوې او کولی شي د دولتي ادارو پر اړتیاوو سربېره، شخصي فرمایشونه واخلي او کارونه یې ترسره کړي.
دوی زياتوي، د نجارۍ کارخونې د تولیداتو خرڅلاو او بازار موندنې په موخه به نږدې وخت کې جلال آباد ښار او نورو ولایتونو کې د دوی د خرڅلاو نمايندګۍ پرانیستل شي.
د ننګرهار کانال شرکت د رسنیو مسوول سید همایون غریب مل وايي: « د دې لپاره چې دلته جوړ شوي توکي هېوادوالو ته په اسانۍ او چټکه توګه ورسېږي، موږ په ښار کې د یوې لویې هټۍ د پرانستلو پلان لرو چې په نږدې ورځو کې به جوړ شي. همدارنګه په پلان کې ده چې د خپلو تولیداتو لپاره د هېواد په نورو ولایتونو کې هم نمایندګۍ پرانیزو.»
د کانال شرکت مسوولین د کار د لا ښه والي او چټکتیا لپاره د نویو وسایلو د پېرلو خبر ورکوي او وايي، د نجارۍ د دې کارخونې د چارو د ښه والي په موخه په پلان کې لري دغې کارخونې ته نوي وسایل وپېري او همدارنګه دایمي برېښنا ورته برابره کړي.
