معصومه ميرزایي هغه مېرمنه ده، چې له کلونو راهیسې سرپل ولایت کې د صنعت او سوداګرۍ پر کارونو بوخته ده.
میرزايي تازه د کار نړیوال سازمان په مالي مرسته د لاسي صنایعو کارخونه جوړه کړې او له زده کړو محرومې کړل شوې ۵۰ نجونې یې له ځان سره پر کار بوختې کړې دي.
ميرزایي په دې اړه وايي: « دلته پر کار بوختې نجونې دست دوزي او مرۍ اوبدنه کوي. ۲۰ تنې د خیاطۍ په برخه کې او ۱۵ تنې د ګلدوزۍ او مرۍ اوبدلو په برخه کې کارکوي، ۱۵ تنې نورې وړۍ اوبي. له ما سره چا مرسته نه ده کړې،بلکې هرڅه مې خپله چمتو کړي ترڅو دغه نجونې کار زده کړي. یوازې مېزونه او څوکۍ یو.اېن.ډي.پي راکړي دي.»
دې کارخونه کې خیاطي، د مریو اوبدلو کار، وړۍ اوبدل او ورته نور د لاسي صنایعو اړوند حرفوي زده کړې هغو نجونو ته ورکول کېږي، چې له زده کړو محرومې کړای شوې دي.
دغه نجونې، چې تازه ورته کاري فرصت برابر شوی، له سرپرست حکومته د صنعتکارو مېرمنو د ملاتړ غوښتنه کوي.
کار زده کوونکې مینا صمدي وايي: « خوشاله کېږم،چې دلته کار زده کړم او له دې لارې کورنۍ ته عاید یوسم.»
کار زدهکوونکې پروین هم ورته خبره کوي او وايي: « یوه میاشت کېږي، چې دلته کار کوم. غواړم کار زده کړم او په راتلونکې کې خپله کارګاه ولرم او نورو کسانو ته یې ور زده کړم، ترڅو له دې لارې خپلو کورنیو سره مرسته وکړو.»
د سرپل صنعت او سوداګرۍ ریاست مسوولین وایي، له متشبثو مېرمنو ملاتړ کوي او د صنعت ودې برخه کې یوشمېر پروګرامونه تر لاس لاندې لري.
د سرپل صنعت او سوداګرۍ رییس عبدالشاکر شهاب وايي: « دلته شاوخوا ۵۰ تنه ښځې پر کار بوختې دي او په نورو ځایونو کې هم ورته کارخونې فعالیت لري. ښځې د دغه شان فرصتونو له برابرېدو څخه راضي دي.»
د دې ولایت صنعت او سوداګرۍ ریاست مسوولینو په وینا، روان کال کې یې د همکارو موسسو په ملاتړ۱۵۰۰ مېرمنو ته په بېلابېلو برخو کې حرفوي زده کړې او کاري فرصتونه برابر کړي دي.
