د ننګرهار کانال شرکت په ۱۶ جریبه ځمکې باندې د یوه خصوصي شرکت له لوري د چوګوړو د تولید فارم پرانيستل شو.
ځايي چارواکي وايي، له دې سره به ننګرهار د غوښې په موخه د تولیدېدونکو چرګانو په برخه کې تر یوې اندازې پر ځان بسیاینې او له بهر څخه به د چورګوړو د واردېدو کچه ټيټه شي.
د دغه ولایت کرنې، اوبو لګولو او مالدارۍ رئیس محمد ولي محسن وايي: « پخوا به دا چرګوړي له بهر څخه وارېدېدل، موږ هڅه کوو، له دې وروسته یې په کور دننه تولید کړو او ځان بساینې خواته لاړ شو.»
د دغه فارم مشر زلمی قریشي وايي، پر فارم شاخوا ۱۳۰ میلیونه افغانۍ پانګونه کړې او په یوه ورځ کې به د ۳۰زره یو ورځنیو چورګوړو د تولید وړتیا لري.
قرېشي زیاتوي:« پلان دی،چې هره ورځ تر ۳۰ زرو چوګوړو تولید کړو او ترڅنګ یې یوه کوچنۍ تولیدي کارخونه هم جوړه کړو. موږ ټولټال تر ۱۳۰ میلیونه افغانۍ پانګونه کړې او په دې سره به لسګونه کسانو ته د کار زمینه هم برابره شي.»
د ننګرهار کرنې، اوبو لګولو او مالدارۍ ریاست مسوولین وايي، اوس مهال په ورځنۍ کچه شاوخوا ۴۰۰ زره یو ورځنیو چورګوړو ته په ننګرهار کې اړتیا شته، چې یوازې ۲۰ زره یې دلته په ننګرهار کې تولیدیږي او پاتې نور یې له پاکستان څخه واردیږي؛ خو په خبره یې، د دغه فارم په جوړېدو سره به دغه اړتیا تر ډېره پوره شي.
