د صنعت او سوداګرۍ وزارت چارواکي وایي، په دې نندارتون کې د ازبېکستان له دولتي او خصوصي سکټور سره د ۲.۵میلیونو ډالرو په ارزښت ۲۵ هوکړه لیکونه لاسلیک شول.
دوی وايي، له یاد هېواد سره یې د ټرانزېټ په برخه کې د نوي هوکړه لیک له مخې افغاني تولیداتو ته دا زمینه برابره کړې، چې د ازبېکستان له لارې يې په کم وخت او لږ لګښت سره روسیې او چین ته ورسوي.
د صنعت او سوداګرۍ وزارت سرپرست نورالدین عزیزي وايي: « ازبېکستان له موږ سره ژمنه وکړه، چې د افغانستان صادراتو ته له پنځو تر پنځه اویا سلنې پورې اجازه او تخفیف ورکړي. اوس کولی شو خپل محصولات په لږ وخت او لګښت سره تر چین او روسیې پورې ورسوو.»
په ورته وخت کې ازبېکستاني چارواکي کابل ته د دې هېواد د لومړي وزیر سفر په هره برخه کې اغېزناک بولي او وایي، له افغانستان سره اقتصادي اړيکې له ګاونډيتوب ورها خوا پر ډېرو مشترکاتو پورې تړلي دي.
په کابل کې د ازبېکستان شارژدافېر خواجه یادګار شادمانوف وايي: « له تېرو درېیو ورځو راهیسې د نندارتون پیلېدل لامل شوي، چې د دواړو هېوادونو ترمنځ اقتصادي دروازې پرانیستل شي. د ازبېکستان لومړي وزیر راتګ له افغانستان سره د اقتصادي اړیکو د لا پیاوړتیا په موخه وشو. په دې نندارتون کې د ۲.۵ میلیونو ډالرو په ارزښت د سوداګرۍ په برخه کې هوکړه لیکونه لاسلیک شول. موږ هیله من یو، چې دغه دوستي لا وغوړېږي.»
بل لور ته د سوداګرۍ او پانګونې خونې مسوولین وایي، له ازبېکستان سربېره نورو ګاونډیو هېوادونو سره هم ښې اقتصادي اړیکې غواړي او په خبره یې هغه ګاونډي هېوادونه، چې په اقتصادي برخه کې ستونزې جوړوي، باید ستونزې د خبرو له لارې یې حل کړي، ترڅو سوداګرو ته زیانونه ونه رسېږي.
د افغانستان او پاکستان د سوداګرۍ ګډې خونې رئيس خان جان الکوزی وايي: « زموږ یو شمېر ګاونډي هېوادونه او په ځانګړې توګه پاکستان ډېر کله ټرانزیتي ستونزې جوړوي. له دې امله چې زموږ محصولات تر ډېره زراعتي دي، د دغو ستونزو له امله خرابېږي.»
د خصوصي سکټور نور چارواکي وايي، دغه ډول نندارتونونه کولی شي، چې سوېلي آسيا له مرکزي آسيا سره ونښلوي او د سوداګرۍ په برخه کې اړینې اسانتیاوې رامنځته کړي.
د افغان خصوصي سکټور چارواکي زیاتوي، میاشت وروسته به د امام ابو حنیفه په نوم بل نندارتون هم په کابل کې جوړ شي، چې په کې به وطني تولیدات نندارې ته وړاندې شي او په لوړه کچه بهرني ميلمانه به هم ګډون ولري.
د سوداګرۍ او پانګونې خونې مرستیال یونس مومند وايي: « افغانستان د منځنۍ آسیا او سوېلي آسیا د هېوادونو ترمنځ پل دی او کولی شي د دغو هېوادونو ترمنځ سوداګري اسانه کړي.»
دا په داسې حال کې ده، چې یوه میاشت وړاندې په تاشکنت کې د افغانستان نندارتون جوړ شوی و، چې د صنعت او سوداګرۍ وزارت د شمېرو له مخې، د ۱۰۰ میلیونو ډالرو په ارزښت هوکړه لیکونه په کې لاسلیک شول او د سوداګرو ترمنځ د ۱۰ میلیونو ډالرو په ارزښت پېر او پلور ترسره شو.
