په هرات ولایت کې د کبانو روزنې صنعت ورځ تر بلې غوړېږي. د دغه ولایت ګذرې ولسوالۍ د کبانو په یوه فارم کې دا مهاله شاوخوا ۲۰ زره کبان ساتل کېږي.
د فارم مسوول فېروز احمد وایي، روزل کېدونکو کبانو ته پوره د نهو میاشتو لپاره ځانګړې خواړه ورکول کېږي او په ژمي کې بیا له خوراک پرته تر اوبو لاندې درې مياشتې ژوند کولی شي.
د احمد په خبره، که څه هم له بهره د کبانو وارداتو له بندېدو سره يې د کاروبار بازارونه ښه شوي، خو له دې سربېره هم د کبانو نسل له کمښت سره مخ دي.
هغه زیاتوي:« زموږ کبان نهه میاشتې خواړه خوري او د ژمي په درېیو میاشتو کې تر اوبو لاندې ژوند کوي. که کبانو ته اړین خواړه ونه رسېږي، د ژمي پرمهال ښايي ژوندي پاتې نه شي.»
په همدې حال کې د کبانو پلورونکي وایي، اوسمهال یې د کبانو پلور بازار تود شوی او دوی خپلو پېرودونکو د اړتیا وړ کبان د هرات له ولسوالیو سربېره له هلمند او فراه ولایتونو څخه هم راوړي.
یو تن کب پلورونکی وکیل احمد وايي: « د کبانو د پخولو یو شمېر مسالې له پاکستانه راوړو او ځینې یې دلته خپله جوړو. د هرځای کبان خپله بیه لري.»
بلخوا دهرات ځایي چارواکي وایي، اوس مهال د هرات انجیل، ګذرې، چشت، زنده جان او غوریان ولسوالیو کې د کبانو ۴۰ فارمونه شتون لري.
د دوی په خبره، هېواد ته له بهرنیو هېوادونو د کبانو وارداتو مخه یې نیولې او په کور دننه د کبانو نسل زیاتوالي لپاره به فارم لرونکو ته امکانات برابر کړي.
د هرات کرنې، اوبو لګولو او مالدارۍ رییس پیر محمد حلیمي وايي: «هرات ولایت به ډېر ژر د کبانو په تولید کې پر ځان بسیا شي. موږ اجازه نه ورکوو، چې دلته څوک له بهره کبان وارد کړي.»
دا په داسي حال کې ده، چې د فارم لرونکو په خبره د کبانو په وزن کې هم زیاتوالی راغلی او ان د یو شمېر هغو وزن تر اتو کیلو هم رسېږي.
