په کابل کې د کار او ټولنیزو چارو وزارت له لوري رابلل شوی دوه ورځنی د کار ملي کنفرانس، چې د ټولو حکومتي ادارو چارواکو، کابینې غړو اود نړیوالو سازمانونو او بنسټونو استازو په ې ګډون کړی وه، د کاري فرصتونو د رامنځ ته کولو په تړاو له دوه ورځیني بحثونو او نظریاتو شریک کولو وروسته پایته ورسیده.
د دغه کنفرانس د وروستۍ ورځې ناسته کې د کابینې ګڼ شمیر غړو ویناوې درلودې او ټینګار یې درلود چې اوس د کاري فرصتونو رامنځ ته کولو لپاره له بل هر وخت ښه زمینه برابره شوې.
خو د کورنیو چارو وزارت سرپرست سراج الدین حقاني له نړۍ وغوښتل، چې د افغانستان عیني حالاتو ته په کتو له اوسني سرپرست حکومت سره د ډيالوګ له لارې کېدی شي، چې د کابل او نړۍ ترمنځ شته فاصلې له منځه ولاړې شي.
حقاني وايي:« د نړیوالو چې کوم مسوولیت دی، افغانستان ته دې د پرون په نظر نه ګوري، افغانستان ته دې د نن په نظر وګوري. دلته که دوی( نړیوال) خپل اخلاص وکړي، خلکو ته د کار کومه زمینه چې موږ ورته برابره کړې، دوی دې له دغه نظام سره اخلاص وکړي. انشاء الله دغه کومه فاصله چې په منځ کې ده، هغه به نوره هم له منځه ولاړه شي. »
حقاني غوښتنه کوي، چې اوس په افغانستان کې ښه کاري فرصتونه رامنځ ته شوي او اړتيا ده،چې نړيوال هم ترې ګټه واخلي.
د نوموړي په خبره، چې له دې وروسته افغانستان د نړۍ لپاره ګواښ نه، بلکې فرصت دی او امنیت یې هم له ډېرو هېوادونو ښه تامین شوی دی.
حقاني زیاتوي:« موږ د چا لپاره ګواښ نه یو. موږ پر خپلو ژمنو باندې ټینګ ولاړ یو، موږ له خپلې خاورې دفاع کول چې کوم دي، دا پر موږ فرض ده، دا زموږ زمه واري ده، همدارنګه زما خاوره، چې ده، د ستا لپاره ګواښ نه ده، ستا لپاره یو ښه فرصت دی، ته راشه، موږ بلنه درکوو، موږ دې امنیت نیسو، ډاډ درکوو.»
په ورته وخت کې د ریاست الو زرا اقتصادي مرستیال وايي، هڅه کوي، چې په افغانستان کې نړیوال سوداګر پانګوونې ته وهڅوي، چې له دې سره به زیات کاري فرصتونه رامنځ ته شي.
ملا عبدالغني برادر اخوند وايي، په حقیقي توګه د افغانستان جغرافیايي موقیعت د ګټې اخیستنې په لټه کې دي او د ریل پټلۍ له لارې به سوداګریز واټنونه رالنډ کړي.
اخوند زیاتوي:« د افغانستان جغرافیایي موقعیت ته په کتو، له سیمې هڅې کېږي، چې له دې څخه په سالمې او مثبتې ګټې اخیستنې خپل هېواد د سوېلي او منځنۍ آسیا د وصل په نقطه بدل کړو، د خپلې سوداګرۍ کچه تر بل هر وخت زیاته کړو، کورنیو تولیداتو ته د صادراتو زمینه برابره کړو، د انرژۍ د لېږد لپاره کار وکړو او د اوسپنې پلټۍ څخه په ګټې اخیستنې سره فاصلې رالنډې او خپلو ملي سوداګرو ته اسانتیاوې رامنځته کړو.»
د کنفرانس په پریکړه لیک کې زیات ټینګار د بېروزګارۍ پر له منځه وړلو، د بې وزلې کچې په راټیټولو، د کاري فرصتونو پر رامنځته کولو او خلکو ته د کار بازار د رامنځ ته کولو له لارې د میعاري کار پر ورکړې شوی.
د کار او ټولنیزو چارو وزارت د کار معين محمد زاهد احمدزی وايي:« د دې کنفرانس مهم اهداف په هېواد کې د بېکارۍ، بېوزلۍ کچې کمښت، د مناسبو کاري فرصتونو رامنځته کول، د کار بازار د پراختیا له لارې توليدي او غوره معیاري کار ته د هېوادوالو لاسرسی دی.»
په ورته وخت کې د کاري فرصتونو او کارموندنې په موخه کار او ټولنیزو چارو وزارت د کلیو او پراختیا وزارت ، د دولتي شرکتونو او تصدیو له لوی ریاست ، د اوبو او برښنا وزارت ، کډوالو چارو ، لوړوزده کړو ، کرنې او مالدارۍ ، ټولګټو چارو، سوداګرۍ او صنعت او د کانونو اوپطرولیم وزارتونو سره هوکړه لیکونه لاسلیک کړل.
د چارو اکو په خبره، د دغو هوکړه لیکونو له مخې، به په راتلوکو۵ کلونو کې ۱.۵ خلکو ته د کار زمینه برابره شي.
د کار او ټولنیزو چارو وزارت ویاند سمیع الله ابراهیمي وايي:« په دغو هوکړه لیکونو کې د کارموندنې او د معیاري کارونو د رامنځته کولو لپاره په مستقیم او غیر مستقیم ډول شاوخوا ۱.۵ میلیونه هېوادوالو ته په راتلونکو پنځو کلونو کې د کار زمینه برابره کېږي.»
د کار ملي کنفرانس ګډونوالو د خپلو خبرو پرمهال وویل، له دې وروسته به افغانان د کار موندنې لپاره په ناقانونه لارو بهرنیو هېوادونو ته لاړ نه شي، تعهد لري چې په کوردننه به ورته د کار زمینه برابره وي.
