ولسمشر د افغانستان- چین ترمنځ هوایي دهلیز پرانیست او لومړۍ ترې د جلغوزیو صادرات پيل شول.
چین ته د هوایي دهلیز پرانسته به د افغان جلغوزیو صادراتو کې د ګاونډیو د درغلۍ مخه ونیسي.
ولسمشر د دغه دهلیز د پرانیستې پر مهال وویل، په دې هڅه کې دې چې د نړۍ له نورو هېوادونو سره هم د هوایي دهلیز له لارې د افغانستان سوداګریزې اړیکې پراخې کړي.
تر دې وړاندې به افغان محصولات په نورو هېوادونو کې د ګاونډیو هېوادونو په نامه پلورل کېدل خو اوس د افغانستان په نامه پلورل کېږي او ښه بازار لري.
ولسمشر همدا راز وویل، چې هېواد هېڅکله په بهرنیو مرستو وده نه شي کولی نو د دایمي ودې لپاره په کار ده، چې افغانان له خپلو طبیعي سرچینو ګټه واخلي.
د سوداګرۍ خونې مسولین وايي د ملي یوالي حکومت د خصوصي سکتور د ستونزو حل کې بریالی ګڼي.
سوداګرۍ او صنایعو خونې وایي له دې وړاندې نړیوال مارکیټ ته د افغانستان تولیدات د نور هیوادونو په نامه صادریدل خو اوس هوايي دهلیزونو دا فرصت برابر کړی چې افغان محصولات په خپل نوم او نښان وپلورل شي.
خصوصي سکتور هم چین ته د ۲ زره ټنه جلغوزیو د لیږد ډاډ ورکړ.
کابل کې د چین سفارت شارژدافیر وایي؛ چینايي مستهلکین له افغاني توکو خوند اخلي او تمه لري چې چین ته د افغانستان صادرات زیات شي.
کابل کې د چین سفارت شارژدافیر داسې وویل (( چین د افغان تولیداتو لپاره ښه مارکیټ دی، د چین وګړي د افغانستان محصولاتو ته لیواله دي او تمه لرو چې د صادراتو ګراف لوړ شي.))
د افغانستان د جلغوزیو کلنی حاصل ۲۳ زره متریک ټنو ته رسېږي او چې لهدې وروسته به نړېوالو بازارونو ته د افغانستان په نوم او نښان صادریږي.
د سوداګرۍ خونې مسولین وايي د جلغوزيو د پروسس لپاره د پانګونې کار پيل شوی دی .
ولسمشر غني د لړم پنځلسمه د جلغوزیو ملي ورځ ونوموله چې هر کال به نمانځل کیږي.
