د رياست الوزرا اقتصادي مرستيال ملا عبدالغني برادر اخوند د کندهار په دامان ولسوالۍ کې د کابل- کندهار پر لويه لار د یوه جامع جومات د جوړولو ډبره کېښوده.
برادر په دې اړه جوړو شوو مراسمو کې وايي، په داسې حال کې چې اقتصادي وضعيت لا هم نه دی سم شوی، خو پر دې سربېره حکومت د پراختيايي پروژو د تطبيق لړۍ چټکه کړې.
د برادر په خبره، دا مهال د هېواد په ټولو ولايتونو کې د حکومت پر مالي ملاتړ ګڼ شمېر لويې او وړې پروژې د تطبيق په حال کې دي.
هغه زیاته کړه:« که وګورو څومره د پروژو پرانېستل چې په افغانستان شوي، یقیقنا زما پر لاس چې په کابل او شاوخوا ولایتونو کې شوي ۲۰۰ پروژې پرانېستل شوي. سره له دې چې زموږ هغه شان اقتصاد نه دی، لکه د یوه جوړ هېواد.»
برادر ډاډ ورکوي د حکومت له لوري د اقتصادي پياوړتيا هېڅې دوام لري او په خبره يې په يادو هڅو کې يې د ټولو ولايتونو ترمنځ انډول په پام کې نيولی دی.
د ټولګټو چارو وزارت چارواکي بيا وايي، د اسلامي امارت د مشر له حکم سره سم پر ټولو لويو لارو جوماتونه جوړوي او په همدې لړ کې يې تازه د کندهار په دامان ولسوالۍ کې د لوی جامع جومات د جوړولو ډبره کېښوده، چې ۵.۳۴ ميليون افغانۍ لګښت پرې راځي.
د ټولګټو چارو سرپرست محمد عیسی ثاني وايي:« د امیر المومنین په امر سره په ټول افغانستان کې ۷۵ جوماتونه جوړېږي. دا پر ولایتونو باندې وېشل شوي، یوازې په کندهار ولایت کې درې جوماتونه جوړېږي. یو دا دی چې نن یې موږ افتتاح کوو.»
هغه وايي، په لنډ وخت کې به د هېواد پر نورو لويو لارو هم دې ته ورته د جامع جوماتونو د جوړولو چارې پيل شي .
