د پاکستان لنډ مهالي لومړي وزیر انوار الحق کاکړ له افغانستان سره د پاکستان د سوداګرۍ پر پیاوړتيا ټينګار کړی دی.
کاکړ د خپلې کابینې په وروستۍ غونډه کې چارواکو ته د افغان ټرانزېټ هوکړې په چوکاټ کې د افغانستان او پاکستان ترمنځ د سوداګرۍ د لا پیاوړي کولو سپارښتنه کړې او زياته کړې يې ده، چې په تورخم، چمن، غلام خان او له افغانستان سره په نورو لارو کې باید د بار وړونکو موټرونو د څار سیستم غښتلی شي، څو په دې توګه د قاچاق مخنیوی وشي.
کاککړ دې هدف ته د رسېدو لپاره سپارښتنه کړې چې د افغان ټرانزېټ هوکړې په چوکاټ کې د صادراتو او وارداتو د څارلو لپاره بايد ګټور ګامونه واخېستل شي.
کاکړ زیاته کړې:« باید ووایم چې د غیر قانوني توکو واردېدو او قاچاق زياتوالی د دې لامل شوی، چې د هېواد اقتصاد ته لوی زیان واوړي. د سوداګریزو توکو د کنټرولولو او ارزولو سیسټم د لا ښه والي لپاره او په چمن کې په ګمرک کې د نویو کارکوونکو د ځای پر ځای کولو سپارښتنه کوم.»
خو د سرپرست حکومت چارواکي د کاکړ تازه څرګندو نو په غبرګون کې وایي، حکومت د ټرانزیټي او نورو توکو په شمول د قاچاق مخنیوي کې جدي دی او د کوم هېواد د نوم له اخېستلو پرته زياتوي، چې ځيني هېوادونه لاهم افغانستان ته د خپلو توکو د قاچاق کولو هڅه کوي.
د اسلامي امارت ویاند ذبیح الله مجاهد وايي:« د افغانستان له خوا د قاچاق مخنیوي لپاره موږ خپله هم ډېر متوجې یو چې هېڅ هېواد ته زموږ له خوا قاچاق ولاړ نه شي او نورو هېوادونو هم باید افغانستان ته قاچاق رانه شي. له بده مرغه په ځېنو برخو کې قاچاقي مواد افغانستان ته اوس هم راروان وي او زموږ امنیتي او پوله ساتي ځواکونه ورته متوجې وي. نو دا ستونزه شته خو د حل لپاره یې موږ ګامونه اخلو. له افغانستانه هم چې څه شی قاچاق کېږي موږ یې مخنیوی کوو. هېله کوو چې د افغانستان او پاکستان ترمنځ تجارت او د تجارانو مالونه او په ځانګړي دول ترانزېټي مالونه افغانستان ته راځي او پاکستان کې نه ښکته کېږي هغوی ته ستونزې جوړې نه شي او زموږ تجاران له خنډ او ځنډ سره مخ نه شي.»
په دې وروستیو کې د اسلاماباد او کابل اړیکې ترینګلي شوي، خو د پاکستاني رسنیو د راپور له مخې ټاکل شوې د سرپرست حکومت او د پاکستان حکومت ترمنځ د تحریک طالبان پاکستان پر سر د ترینګلو اړیکو ښه کېدو لپاره د کندهار والي ملا شیرین پر مشرۍ پلاوی اسلام اباد ته سفر وکړي.
خو اوس پوښتنه دا ده، چې له شواهدو پرته اسلاماباد ولې پر کابل په پاکستان کې د کډوډۍ تور پورې کوي؟
د سیاسي چارو کارپوه سمیر انګار وايي:« لکه څنګه چې موږ ګورو، د پاکستان دولت هر وخت د افغانستان په اړه ضد او نقیض څرګندونې کوي.»
د سیاسي چارو کارپوه سرور نیازی وايي:« یو شمېر کسان یا مافیايي کړۍ دي چې قاچاق د هغوی کاروبار دی. نو په دغه پوله که هرڅومره څارنه او کنټرول زیاتېږي دا د دواړو هېوادونو پر ګټه ده. دلته به د تروریستي ډلو تګ راتګ تر کنټرول لاندې نېول کېږي.»
واک ته د سرپرست حکومت له رسېدو راهيسې پاکستان پرته له دې چې له فغان کډوالو او سوداګرو سره خپل ناسم چلن ته متوجې شي پر افغانستان تور پورې کوي، چې ګواکې د پاکستان له مخالفو عناصرو سره همکار دی.
