په کابل کې د پولي خدماتو د راګړې ورکړې د لا پیاوړتیا لپاره له شهزاده سرای وروسته د سرافيو يو بل لوی مارکېټ پر فعالیت پیل وکړ.
مسوولین وایي، دا چاره به لا ډېره مرسته وکړي څو په دولتي او خصوصي ډول خلکو ته لا ډېرې اسانتیاوې رامنځته کړي.
د حمید صرافيو مارکېټ مشر لال اقا رئیس وايي: « دا د مارکېټ، پېرېدونکو، سوداګرو، زرګرانو او هغه چا لپاره، چې موږ سره په دې مارکېټ کې کار کوي، د اړتیاوو د رفع کولو لپاره یوه مهمه موضوع وه.»
د صرافانو ټولنې عمومي مشر بهرام ځدراڼ وايي، د صرافانو ټولنې په اوسني اقتصادي پرمختګ کې لویه ونډه لرلې او د بهرنيو اسعارو پر وړاندې د افغانيو اوسنی ثبات د دوی د خدمتونو پايله ده.
ځدراڼ زیاتوي: « صرافان نه یوازې دا چې صرافان دي، دوی صنعت کاران او سوداګر هم دي، دوی د افغانستان په اقتصاد کې د ملا د تیر حېثیت لري. دا دوه، دوه نیم کاله چې دلته اسلامي امارت راغلی او کومې لاسته راوړنې یې درلودلي، د سوداګرۍ کومه برخه چې دوی چلولې ده، دا بهرنیانو ته د نه منلو وړ نه دي، دوی باور نه کاوه چې افغانستان او د افغانستان اقتصاد او ټرانزیټ به په دې توګه پاتې شي.»
ځدراڼ وايي، دا مرګز به وکولی شي، چې پر شهزاده سرای اوسۍ ګڼه ګوڼه راکمه او خلکو ته د لا ډېر کار زمینه برابره کړي.
هغه زیاتوي: « دا به یو د سرای شهزاده پر صرافانو وزن کم کړي او بل دا چې خلکو ته به د کار زمینه هم برابره کړي. زه له دوی ډېر منندوی یم او چا چې دا پلان جوړ کړی هغه دې په خپل پلان کې بریالي اوسي.»
صرافان غوښتنه کوي چې حکومت دې د دوی امنیت ټینګښت ته لا ډېر پام وکړي او ورپیښ ګواښونه دې له منځه یوسي.
یو تن صراف دادګل وايي: « زما په ګډون له امنیتي ارګانونو غواړو چې صراف، سوداګر، صنعت کار او د هغه چا د سر او مال د خونديتوب ضمانت وکړي چې غواړي په دې وطن کې پانګونه، کار او فعالیت وکړي. دوی په پښو ودوري او نور خلک یې په څنګ کې د عزت او نېکمرغۍ ژوند ولري.»
همدې ناستې ته مسولینو او صرافانو له بهر میشتو سوداګرو وغوښتل څو هېواد کې خپله پانګونه تر سره او خلکو ته کاري فرصتونه برابر کړي.
