د پاکستان د تجارت او پرمختګ ادارې مشر محمد زبیر موتي والا وايي، افغانستان له پاکستان سره د ۲.۴ مليارده ډالرو په ارزښت تجاراتي راکړه ورکړه لري، چې په دې تجارتي راکړه ورکړه کې ۷۰ سلنه توکي له پاکستان افغانستان ته راوړل کيږي.
موتي والا زیاتوي:« افغانستان او پاکستان دوه هغه هېوادونه دي چې غوره اړیکې لري. افغانستان له پاکستان سره د څه باندې ۲.۴میلیارده ډالرو په ارزښت تجارتي راکړه ورکړه لري چې ۳۳ سلنه یې پاکستان سره دي. د پاکستان له لارې افغانستان ته ۷۰ سلنه توکي راځي. پوهېږم چې یو څه کمی به په دې شمېرو کې راغلی وي، ځکه په نورو لارو هم افغانستان راکړه ورکړه ترسره کړې، خو د دې ستونزو پر حل کار کوو.»
په کور دننه افغان پانکوال او سوادګر بیا وايي، ګاونډي او سيمي هېوادونه له افغانستان سره په متقابل احترام ولاړې سوداګریزې اړيکې نه پالي او د فرصتونو برابرولو پر ځای په محدوديتونو او خنډونو په رامنځته کولوغور کوي.
افغان پانګوال نيوکه لري چې پاکستان سره په ترانزيټې برخه کې له ستونزو سره مخ دي او له همدې امله افغانستان په کال کې ۸۰۰ میليونه ډالر زيان ويني.
د پاکستان د تجارت او پرمختګ ادارې مشر محمد ذبیر موتي والا هم په ترانزيټي برخه کې شته ستونزې مني او د ژر حل کېدو ډاډ ورکوي.
هغه زیاته کړه:« ترانزیت برخه کې هم ستونزه شته چې هغه به هم په نژدې ورځو کې حل شي. موږ غواړو چې له افغانستان سره اقتصادي اړیکې پیاوړي شي او دوه طرفه باید پرمختګ رامنځته شي. دا باید ومنو چې ترانزیټ برخه کې به ستونزې وي او د دې ستونزو حل لپاره پر ګډه کار کوو. افغانستان کې د پانګونې زیات فرصتونه شته دي، کانونه او زیرمې زیاتې دي، په دې برخه کې چې څومره کار وشي نو اقتصادي پرمختګ ته به لاره هواره شي.»
د پاکستان د تجارات او پرمختګ ادارې مشر دغه څرګندونې داسې مهال کوي چې د هيېاد صنعت او سوداګرۍ وزارت مسوولين په تیرو څلورو مياشتو له پاکستان سره د سودګرۍ کچه ۳۶۲ ميليونه يادوي او وايي اوسمهال لدې هېواد سره د افغانستان سوداګريزه اړيکه په نورمال حالت دوام لري او په دې برخه کې د نورو اسانتیاوو رامنځه کولو خبر ورکوي.
