د ریاست الوزرا اقتصادي معاونیت: یو شمېر بهرنیو شرکتونو هېواد کې پانګونې پيل کړي

د ریاست ‌الوزرا اقتصادي معاونیت دفتر له لوري د  اسلامي امارت د ۱۴۰۱ کال د لا سته راوړنو په اړه خپره کړې خبرپاڼه کې ویلي،چې  تېر کال لسګونو سترو بهرنیو شرکتونو د افغانستان په بېلابېلو برخو کې د شااوخوا ۱۰ میلیارده ډالرو پانګونې لپاره چمتوالی ښودلی وه، چې ځینو یې عملا خپلې چارې پیل کړې دي.

په خبرپاڼه کې وړاندې ویل شوي،چې  په ‌دې کال کې د صادراتو کچه دوه مېلیارډه ډالرو ته لوړه شوې وه.

په خبرپاڼه کې دغه راز ویل شوي،چې په هېواد کې تورم یا انفلاسیون راکم شوی او افغانۍ د سارک سازمان د غړو هېوادونو په منځ کې د بهرنیو اسعارو پر وړاندې د غوره ثبات لرونکي پولي واحد په توګه پېژندل شوې ده.

خبرپاڼه کې راغلي،چې په دغه کال کې له کورنیو عوایدو بودیجه تمویل شوه، د متشبثینو او سوداګرو ستونزو ته رسېدنه شوې، د برېښنایي حکومتولۍ په برخه کې کوټلي ګامونه اخېستل شوي او د بانکي سکټور چارې هم عادي شوي دي.