په کندز کې د شاتو مچیو کاروبار ښه شوی

د کندز ولایت د کرنې اوبو لګولو او مالدارۍ ریاست  مسوولین وايي، دغه ولایت کې  د وړم ۱۴۰۰کال  په پرتله د شاتو په تولید کې د ۳۷ سلنې زیاتوالي راغلی دی.

د یاد ریاست مشر مولوي امان الله حسن ویلي، ۱۴۰۰  کال په دغه ولایت کې ۳۷ زره ۵۰۰ کیلوګرامه شات تولید شوي ول، چې دغه شمېره په تېر ۱۴۰۱ لمریز کال کې ۵۹ زره ۴۰۰ کیلوګرامه ته لوړه شوې، چې د وړم کال پرتله ۳۷ سلنه زیاتوالی ښيي.

 حسن د عوایدو د زیاتوالي لامل د شاتو مچیو فارم لروونکو ته تخنیکي لارښونې، د شاتو مچیو فارم لرونکو ته د مرستندویه موسسو په همکارۍ د مچیو ورکول او دغه راز د شاتو مچیو فارم لروونکو ټولنې رامنځته کول یادوي.

حسن زیاته کړې، ډېر شات له مرکز سربېره، خان آباد، چهاردرې او امام صاحب ولسوالیو کې تولید شوي دي.