د مارچ اتمه په ټولنه کې د ښځو رول پياوړي کولو او د هغوی شخصیت ته د درناوي په موخه نمانځل کېږي. ملګري ملتونه وايي، افغانستان کې رسمي عدلي مکانېزمونو ته د ښځو لاسرسی محدودی او دا يې د خونديتوب او وقار ډاډمنېدو لپاره بشپړ حق دی چې عدالت ته لاسرسی ولري.
د افغانستان لپاره د ملګرو ملګرو ملتونو د ښځو برخې استازې سوزان فرګوسن ویلي: « په افغانستان کې د رسمي عدالت مکانېزمونو ته د نارینهوو په پرتله د ښځو لاسرسی نږدې څلور برابره کم دی. دا د عدالت په برخه کې یوه پراخه تشه په ګوته کوي او ډېری ښځې د خپلو حقونو ترلاسه کولو، خوندیتوب لټون او همدارنګه د ناوړه ګټه اخستنې مخنيوی په برخو کې له ستونزو سره مخامخوي.»
همدارنګه، یو شمېر پخواني امریکايي ډېپلوماټان هم په افغانستان کې د ښځو حقونه محدود شوي بولي او له اسلامي امارت غواړي چې د حقونو اعادې په موخه ښځو او نجونو ته د کار، زده کړو او تحصیل اجازه ورکړي.
د افغانستان سولې لپاره د امریکا پخوانی ځانګړی استازی زلمی خلیلزاد وايي: « زه د افغانستان پر حکومت غږ کوم چې افغان نجونو او ښځو ته اجازه ورکړي چې ښوونځیو او پوهنتونونو کې زدهکړې وکړي.»
په ورته مهال، یو شمېر ښځې هم غوښتنه کوي چې اسلامې امارت دې نجونو او ښځو ته د کار او زدهکړو اجازه ورکړي؛ ځکه د دوی په خبره، د ښځو د زده کړو ځنډول په اوږدمهال کې هېواد له نه جبرانېدونکو ستونزو سره مخ کولی شي.
صنعتکاره لیلما امرخېل وايي: « د امارت له حکومت څخه زموږ غوښتنه دا ده چې ښځو او نجونو ته د زده کړو اجازه ورکړي. افغانستان ښوونکو او ډاکټرانو ته سخته اړتیا لري.»
حکومت هم د ښځو حقونو ته د خپلې ژمنتيا ډاډ ورکوي او زياتوي، واک ته له رسېدو راهيسې يې د شريعت په چوکاټ کې د ښځو حقونه ورکړي. مسوولان زياتوي، د حقونو ورکړې په لړ کې هغو ښځو هم خپل حقه حقونه ترلاسه کړي چې له کلونو راهيسې له تاوتريخوالي سره مخ وې او حقوق یې نه ورکول کېدل.
د امربالمعروف او نهې عنالمنکر وزارت ویاند سیف السلام خیبر وايي: « د امربالمعروف، نهې عن المنکر او شکایتونو اورېدلو وزارت د خپل شرعي مکلفیت له مخې، د هېواد په کچه د ښځو د حقونو خوندیتوب، د کورني تاوتریخوالي مخنیوي، د میراث او نفقې حقونو د تأمین او د ناوړه دودونو له منځه وړلو لپاره دوامداره هڅې کړې او ادامه به ولري.»
په تېرو شاوخوا پنځو کلونو کې یو شمېر هېوادونو او نړیوالو سازمانونو په وار وار له اسلامي امارت غوښتي چې په افغانستان کې د ښځو او نجونو د زدهکړو او کار ځنډولو په اړه پر خپلو پرېکړو او پالیسیو له سره غور وکړي، خو اسلامي امارت ډاډ ورکړی چې د مناسب چاپېریال په رامنځته کېدو سره به نجونو او ښځو ته د زده کړو او کار زمینې برابرې شي.
