په خوست ولایت کې د رحمت ولي مسرور کرېکټ لوبغالی چې د هېواد او سوېل ختیځ زون پر کچه د کرېکټ له مهمو لوبغالو بلل کیږي، تازه په کې د کرېکټ بورډ له خوا د شاوخوا ۳۴ میلیونه افغانیو په لګښت د نندارچیانو لپاره د نویو ځایونو جوړولو چارې پیل شوې.
چارواکي وايي، د یادې پروژې له پلي کېدو سره به په دې لوبغالي کې د ننداره کوونکو د ځایونې ظرفیت ۱۵ زرو تنو ته لوړ شي.
د افغانستان کرېکټ بورډ د انجینرۍ څانګې مشر ممتاز عمرزی وايي: « د دې پروژې له پای ته رسېدو وروسته راتلونکی کال د ننداره کوونکو لپاره د ناستې ځای او سیوري تدابیر په پام کې نیول شوي. موږ په دې اړه له بهرنیو کمپنیو سره په تماس کې یو، ترڅو د ناستې لپاره د څوکیو او سیوري جوړولو پروژه هم پيل کړو.»
د افغانستان کرېکټ بورډ استازی رحمت الله احمدي وايي: « همدارنګه هڅه کېږي چې په ټول هېواد کې د کرېکټ د ودې او پرمختګ لپاره ګڼ سهولتونه رامنځته شي. د کرېکټ بورډ رهبرۍ تل هڅه کړې چې کرېکټ د هېواد لرې پرتو سیمو ته هم ورسوي.»
اخوا د کرېکټ یو شمېر مینه وال او لوبغاړي له کرېکټ بورډ غواړي چې په دې ولایت کې د کرېکټ د سلګونه زره مینه والو ترڅنګ، لسګونه لوبغاړي شته چې باید ورته د اسانتیاوو په برخه کې لا ډېر پلانونه تطبیق شي.
خوست کې د کرېکټ یو لوبغاړی حضرت الله وايي: « د خوست د دې دولتي اکاډمۍ پېچونه[ویشتنځایونه] پخوا کم و، اوس ۸ ته رسېدلي، خو د لوبغاړو شمېر ته په کتو دا پېچونه اوس هم کم دي.»
د خوست اوسېدونکی سراج حقمل وايي: « دا ډېره مهمه ده چې دا ډول لویې او مهمې پروژې په لاره واچول شي، ځکه چې د خوست زرګونه کسان د کرېکټ مینه وال دي او دلته د نندارې لپاره راځي.»
د خوست اوسېدونکی محمد وسیم وايي: « په راتلونکي کې د نورو اسانتیاوو غوښتنه هم لرو. اوس هم د سایه بان او لایټېنګ سیسټمونو نیمګړتیاوې شته دي.»
رحمت ولي مسرور کرېکټ لوبغالي کې د یادې رغنیزې پروژې د چارو له پیل سره هم مهاله د کرېکټ بورډ چارواکي وایي، په پام کې ده چې د هېواد د څلورو زونونو ستر لوبغالي له نړیوالو معیارونو سره سم جوړ او په عصري اسانتیاوو سنبال شي.
د دوی په خبره، سږ کال د دغو رغنیزو پروژو عملي کارونه او چارې پیل شوې دي.
