کاسا زر له منځنۍ آسيا د افغانستان له لارې سوېلي آسيا ته د انرژۍ د لېږد لويه پروژه بلل کېږي چې په وسيله يې د قرغيزستان او تاجیکستان برېښنا پاکستان ته لېږدول کېږي.
تازه تاجیکستاني چارواکو ویلي، د یادي پروژې چارې په تاجیکستان او قرغيزستان کې پای ته رسېدلي او په خبره يې په افغانستان او پاکستان کې يې هم د پلې کېدو چارې په چټکۍ سره روانې دي.
دوی کاسا زر د څلورهېوادونو لپاره ستره او ارزښت ناکه پروژه بللې او زیاتوي چي د دې پروژې له بشپړولو سره به د څلور واړه هېوادونو کې ګڼې ستونزې حل شي.
د تاجیکستان د اوبو او انرژۍ وزیر دلیر جمعه ویلي: « کاسا زر پروژه په سیمه کې د څلورو هېوادونو ترمنځ ستره پروژه ده. له نېکه مرغه د دې پروژې د تطبيق چارې په تاجیکستان او قرغیزستان کې پای ته رسېدلي او په پاکستان کې یې د تطبيق پروسه په چټکۍ سره روانه ده. ټاکل شوې چې په دې هېواد کې د یادې پروژې د تطبيق چارې د روان کال په نیمايي کې بشپړې شي.»
جمعه زیاته کړې، په افغانستان کې هم د یادې پروژې د تطبيق چارې په چټکۍ سره روانې دي او په را روان ۲۰۲۷ کال کې به یاده پروژه ګټې اخيستنې ته وسپارل شي.
جمعه په دې اړه ویلي: « له اوږدو مذاکراتو وروسته، د پروژې اهمیت ته په کتو، د پروژې ستونزې له نړیوالو همکارانو سره حل شوي. د افغانستان په برخه کې د پروژې لپاره بودیجه له سره ورکړل شوه چې د تطبيق چارې يې روانې دي او ښايي تر ۲۰۲۶زېږدیز کاله پورې په افغانستان کې د یادې پروژې چارې بشپړې شي او ۲۰۲۷ کال کې به ګټې اخیستنې ته په بشپړه توګه چمتوو شي.»
په ورته مهال د اقتصادي چارو شنونکي وايي، د کاسا زر پروژه د افغانستان لپاره د برېښنا ستونزو د حل ترڅنک نورې اقتصادې ګټې هم لري.
دوی وايي، د يادې پروژې د تطبيق پرمهال خلکو ته کاري فرصتونه زياتېدای شي او دغه راز د هغو ستونزو د حل اټکل هم کوي چې د برېښنا کمبود له درکه رامنځته شوې دي.
د اقتصادې چارو شنونکی عبدالنصیر ریشتیا وايي: « کاسا زر د مرکزي آسیا له هېوادونو د افغانستان له لارې سوېلي آسیا ته د برېښنا لېږدولو یوه مهم پروژه ده. کله چې دا پروژه بشپړېږي، بې له شکه چې له اقتصادي پلوه کولی شي افغانستان ته ډېره ګټه ورسوي. افغانستان کولی شي په کلنۍ توګه له دې پروژې ۳۰۰ مېګاواټه برېښنا ترلاسه کړي او له ۴۵ تر ۶۵ میلیونه ډالرو هم د ټرانزیټ حق ترلاسه کړي.»
د کاسا زر پروژه څه د پاسه یو زر او ۲۰۰ کیلومټرو په اوږدوالي د مزو غځولو له لارې له قرغيزستان او تاجیکستان یو زر ۳۰۰ مېګاواټه برېښنا لېږدوي چې ۳۰۰ مېګاواټه د افغانستان او پاتې زر مېګاواټه هغه يې پاکستان ته د افغانستان له لارې انتقالېږي.
دا پروژه د کابل، ننګرهار، بغلان او پنجشېر په ګډون له اوو ولایتونو او ۳۷ ولسوالیو تېرېږي. په وروستیو کلونو کې د دې پروژې ستونزه د تمويلوونکو له خوا د افغانستان د برخې د مالي تامین ځنډولې و.
