دوی وايي، د اسلامي امارت له مشرتابه سره د دغو اندیښنو د شریکولو لپاره اسلام اباد په بېړه کابل ته پلاوی راولېږه او دلته یې په یوشمیر مهمو امنیتي مسایلو بحث او خبرې وکړې.
د سیاسي چارو شنونکی عزیزمعارج وايي:« په باطن کې دا یو سیاسي او استخباراتي سفر و،ځکه د مسکو له ناستې وروسته هلته طالبانو د مسکو له چارواکو سره بیا هند، ایران ، چین او د ناستې د لسو ګډون کوونکو هېوادونو سره د ناستې په څنډه کې لېدنې درلودې. دوی دلته اندیښنې پیدا کړې،که چېرې افغانستان د مرکزي اسیا له هېوادونو سره سوداګرۍ او اړیکې پیدا کړي،نو پاکستان د خپل سیال هند په تړاو زیات اندیښمن و او کابل ته راغلل، چې ځان پوه کړي.»
خو اسلامي امارت وايي، له پاکستاني پلاوي سره یې پر اقتصادي راکړې ورکړې، د افغان سوداګرو لپاره د اسانتیاوو برابرولو او پښتونخوا او پاکستان ته د عامو افغانانو د تګ راتګ په برخوکې هوکړې کړي دي.
د اطلاعاتو او کلتور وزارت مرسیتال ذبیح الله مجاهد وايي، نه باید د یوې اندیښنې لپاره ټول ولس په ستونزو کې واچول شي او د تګ راتګ مخه یې ونیول شي.
مجاهد زیاته کړه:« ژمنې یې دا وکړې،چې افغان ګډوالو او ناروغانو ته به سهولتونه برابروي او کوشش به وشي،چې ویزه تورخم کې ورکړي او د تورخم لار به ۲۴ ساعته خلاصه وي،خو د مسافرو لپاره به ۱۲ ساعته وي او په دغو مسایلو یې ژمنې وکړې. پاکستان امنیتي اندیښنې لري او دروازو د بندیدو علت هم امنیتې اندیښنې وې،چې دوی په ګوته کړې او زیاته ګړه،چې ډېرو خلکو ته د تګ اجازه ځکه نه شي ورکولای،چې موږ امنیتي اندیښنه لرو. پر دې دا خبره وشوه،چې تاسو خپل امنیتي اورګانونه لرئ، که څوک شکمن کس او یاهم له وسلې سره دراوړي په دې خبره او بحث کیدای شي،خو نباید د دې لپاره د ټولو خلکو مخه ونیول شي او ستونزې ورته پیدا شي،په دې مو سره بحث وکړ.»
د بهرنیو چارو وزیر شاه محمود قریشي پر مشرۍ د پاکستان جګپوړی پلاوی،چې دوه ورځې وړاندې په یوه ورځيني سفر کابل ته راغلی و، په ترکیب کې یې د پاکستان استخباراتو پخوانی مشر فیض حمید او یو شمیر نورو پوځي چارواکو برخه درلوده.
