د تحریک طالبان پاکستان یا ټي ټي پي ډلې ویاند په ورته وخت کې د خپلې ډلې پر وسله والو غږ کړی، چې خپلو بریدونو ته زور ورکړي.
د لوېدیځ د ګټو پر ضد او له اسلامي ارزښتونو ساتنه او پاکستان کې د اسلامي شریعت نافذېدلو داعیه هغه تړاو دی، چې د پاکستاني طالبانو ډله په کور دننه او په سیمه ییزه کچه د هغوی ملاتړي مرستې ته هڅولی شي.
د پاکستان لومړي وزیر عمران خان په خبره، له پاکستاني طالبانو سره یې د سولې خبرې افغانستان کې پیل کړي دی.
خان زیاتوي:«خبرې اترې په افغانستان کې دوام لري او موږ ویلی شو، چې افغان طالبان همکاري کوي.»
ښکاري، چې د طالبانو د ځپلو لپاره پر پاکستان د لویدیځ د مرستو سرچېنې وچې شوي دي او یا به نور نه غواړي د امریکا د خوشحالولو لپاره تر خپل حاکمیت لاندې سیمو کې ولسونه وځپي.
عمران خان وايي:« زه په پوځي حل بارو نه لرم. زه د نظامي حل پر ضد یم. د یوه سیاست وال په حیث سیاسي مذاکرات هغه لار وینم، چې مایې د افغانستان په اړه هم ویلي و.»
پاکستان د ترهګرۍ سره د مبارزې په نوم له امریکا میلیاردونه ډالر اخیستي، خاوره او فضاء یې هغوی ته په اختیار کې ورکړې ده، چې زرګونه پښتانه یې د ترهګرو په نوم وژلي او یا یې ژوندي ورک کړي دي، اوس چې ظاهراً امریکا له سیمې وتلې، پاکستاني سیاستوال د خپل تېر عمل په اړه د ولس قضاوت څخه اندېښنه کې دي.
