د سیاسي چارو یو شمېر شنونکي وايي،ترهغې،چې طالبان د خپل بهرني سیاست اساسات روښانه نه کړي،نړیوال به یې حکومت په رسمیت ونه پېژني.
شنونکي وايي، له طالبانو غوښتنه غواړي،چې ژر تر ژره د خپل بهرني سیاست تګلاره نړیوالو ته واضح کړي او د رسمیت پېژندې لپاره نړیوالو سره خبرې پيل کړي.
د سیاسي چارو شنونکی عزیز معارج وايي:« افغان حکومت او د بهرنیو چارو وزارت باید ژر تر ژره نړیوالو ته په بهرنیو چارو کې خپله سیاسي ډیپلوماسي اعلان کړي او یا که چېرې هغوی کومه ستونزه لري، د دوی په پېژندلو کې بیا کولای شي اعلامیه واستوي او یا پلاوي سره تبادله کړي.»
خو اسلامي امارت وایي،د یو دولت د رسمیت پېژندنې لپاره اړین شرایط یې پوره کړي او نړیوال دې له فشارونو لاس واخلي.
د ښځو حقونو خوندیتوب، بشري حقونو ته درناوی او ترهګرو ډلو سره د اړیکو نه ساتل د نړیوالې ټولنې له خوا وړاندې شوي شرطونه دي.
پر طالبانو له دې امله هم نیوکې دي،چې حکومت یې ټول شموله نه دی او دې کار نړیوال ځنډني کړي،چې په رسمیت یې ونه پېژني.
د سیاسي چارو شنونکی طارق فرهادي وايي:« څو ورځو کې نړیوالو او سیمې هېوادونو وویل،چې د طالبانو حکومت ټول شمول نه ده. مانا دا ده،چې نه یوازې طالب هغه څوک چې طالب هم نه ده نه لیدل کېږي،بلکې تخصیصي هم نه ده. هغه ځوانان او نجونې چې علاقه لري،حکومت کې شامل شي دا باید اصلاح شي.»
دوی پر امریکا او نورو نړیوالو هم نیوکه وکړه،چې له فشارونو کار اخلي او سیمه کې د خپلو ګټو د پاللو په درشل کې دي.
د اسلامي امارت له واکمنۍ نږدې یوه نیمه میاشت پوره کېږي،خو نړیوالو د طالبانو له لوري اعلان شوی سرپرست حکومت تر اوسه پورې په رسمیت نه دی منلی.
امریکا او اروپایي ټولنې ویلي،لا وختي ده،چې افغانستان کې حاکم حکومت دې د دوی له لوري په رسمیت وپېژندل شي.
د روسیې د بهرنیو چارو وزیر ویلي، د ملګرو ملتونو امنیت شورا پر طالبانو د بندیزونو په لرې کېدو لا غور هم نه ده کړی او په و نا یې د طالبانو په اړه د روسیې، چین، امریکا او پاکستان دریځ یو دی.
