د ناټو سرمنشي ویلي، طالبان د جګړې له لارې نه شي بریالي کېدای او د حل لار خبرې دي.
تر هغې چې طالبانو له تاوتریخوالي لاس نه وي اخیستی ناټو به افغانستان کې وي.
دناټو سرمنشي المان ته د خپل سفر په مهال ویلي، طالبان د زور له لارې نه شي کولی افغان ځواکونو ته ماتې ورکړي.
ینس سټولټنبرګ ویلي، افغانستان کې زیاتې ستونزې او ګواښونه شته خو پرمختګونه هم د پام وړ دي.
د هغه په خبره افغان دفاعي او امنیتي ځواکونه اوس هغه دنده چې مخکې سل زرو بهرنیو سرتیرو تر سره کوله دوی یې په غاړه لري.
د ناټو سرمنشي په خبره دا طالبانو ته ښکاره پيغام دی چې نه شي کولی د زور له لارې میدان وګټي نو د همدې لپاره دې د خبرو میز ته کیني او جګړې ته دې د یو سیاسي هوکړې له لارې پای ورکړي.
ینس سټولټنبرګ د افغان ځواکونو په ملاتړ ټینګار کړی او ویلي یې دي، د ترهګرۍ پر ضد غوره تګلاره داده چې د افغان ځواکونو روزنه او ملاتړ وشي.
