ټاکنو کمېسیون ټولې بایومټریکې رايي ډېټا او عمومي سرورته داخلې کړې.
ټاکنو کمېسیون تېره ورځ ناوخته رامنځته شوې ټولې ستونزې حل کړې او سمدلاسه یې په کار پیل وکړ چې د تېرې شپې په دریو بجو یې ټولې بایومټریکي رايي عمومي سرور ته داخلې کړې.
د ټاکنو کمېسیون د دارلانشاء رییس حبیب الرحمان ننګ داسې وویل (( د ناظرینو په موجودیت کې را پورته شوی جنجال پای ته ورسید او رای سرور ته داخل شوې، موږ به اوس هغه تخنیکي کارونه چې پاتې دي ترسره کوو به یې.))
د کمېسیون مسولین وايي، دوی د پایلو د اعلان لپاره ټولې ستونزې له مخې لېرې کړي او اوس د درملوک جرمني کمپنۍ کار روان کړی چې بایومټریکې رايې تصفیه کړي او له هغې وروسته به د لومړنیو پایلو کره ورځ اعلان کړي.
د ټاکنو کمېسیون د مالوماتو له مخې ټولټال یومیلیون نهه لکه او دیرش زره بایومټریکي رايي کارېدلې چې اوس دغه اعلان شوې شمېره په اوو پړاو کې تفصیه کیږي چې د دغه شمېرې د را کمېدو امکان شته.
د ټاکنو پروسې څارونکي وايي، کمېسیون باید د لومړنیو پایلو د اعلان په برخه کې واضح ځواب ورکړي چې کله یې اعلانوي.
د دولت جوړونکي ټیم څارونکی داوود سلطانزوی داسې وویل (( جلسه نیسو تر څو له هغوی دقیق ډاډ تر لاسه کړو، بیا هم غواړم یاده کړم، چې ددوی لخوا ډاډ باید موثق ډاډ وي.))
په کمېسیون کې موثقې سرچنې وايي، تر اوسه د دې احتمال نشته چې ټاکنې دې دویم پړاو ته لاړې شي، خو وايي که سیستم له څلویښتو زرو زیاتې رايي له سیستم څخه وباسي نو دویم پړاو ته يې د تګ امکانات زیاتیږي.
د کمېسیون مسولین وايي، که ټاکنې دویم پړاو ته لاړې شي دوی په دوو اوونیو کې یې بیا ترسره کېدو ته چمتو دي.
