په میدان وردګو کې هوایي برید کې وژل شوي کسان ټول ملکي وګړي او د یوې کورنۍ غړي وو.
د افغانستان د بشري حقونو خپلواک کمیسیون وایي ددوی موندنې ښيي، چې د میدان وردګو ولایت په تنګي دره کې د بهرنیو ځواکونو په یوه هوایي برید کې ملکي وګړي وژل شوي دي.
ددغه کمیسیون په وینا وژل شوي کسان د یوې کورنۍ غړي او نږدې خپلوان وو چې له یوې مېلمستیا راستنېدل.
د بشري حقونو د خپلواک کمیسیون کمیشنر او ویاند شکر الله مشکور وايي په دې اړه یې له بهرنیو ځواکونو سره خبرې پيل کړې دي او دوی اړ دي چې د یادو کورنیو زیانونه جبران کړي.
د مشکور په خبره له بهرنیو ځواکونو به دا ژمنه هم اخلي چې نور د ورته پېښو له تکرار مخنیوی وکړي.
له دې سره سم د افغانستان د بشري حقونو خپلواک کمیسیون مشرې شهرزاد اکبر د وسله والو ډلو او حکومتي ځواکونو له لوري د ملکي وګړو مرګ ژوبله یوه له جدي اندېښنو ښودلې ده.
اغلې شهرزاد اکبر ویلي، د ملکي مرګ ژوبلې د کمولو لپاره باید جدی اقدامات وشي او له افغان ځواکونو تمه داده چې ملکي وګړي خوندي کړي.
نوموړې د میدان وردګو، فاریاب، ننګرهار ولایتونو یادونه کړې چې په خبره یې د افغان ځواکونو عملیاتو کې ملکي وګړو ته مرګ زوبله اوښتې ده.
هغې په ورته وخت کې د طالبانو له لوري ملکي وګړو ته د مرګ ژوبلې اړول غندلي او پر ښکیلو لوریو یې غږ کړی چې په جدي توګه دې د عامو خلکو تلفاتو اوښتو مخنیوی وکړي.
