روسیې د افغانانو ترمنځ په خپلمنځي خبرو ټینګار کړی.
روسیې د طالبانو او امریکایانو ترمنځ له شوې هوکړې د ملاتړ تر څنګ د افغانانو په خپل منځي خبرو ټینګار کړی.
په ملګرو ملتونو کې د روسیې استازي واسیلي نبینزیا ویلي، دوی په افغانستان کې د تل پاتې سولې او ثبات ملاتړ کوي.
روسي استازي ویلي، د افغانستان په تړاو یې له امریکایانو سره ګټور بحثونه کړي.
د نبینزیا په خبره دوی ددې غوښتونکي دي چې په افغانستان کې روانه جګړه ختمه شي او دغه هېواد ته دایمي ثبات او سوله راشي.
نبینزیا ټینګار کړی چې روسیه د افغانانو ترمنځ د رامنځ ته شوې هوکړې ملاتړ کوي او هڅه یې دا ده چې افغانان په خپلو کې سره کېني او شته ستونزې د یوه بین الافغاني توافق په رامنځ ته کېدو حل شي.
هغه د سیمې د امنیت او ثبات لپاره د افغانستان امنیت مهم بللی او ټینګار یې کړی چې روسیه به د سولې د ټینګښت لپاره خپل ملاتړ و نه سپموي.
