امریکا غواړي له دوه زره او شلم کال مخکې له افغانستان خپل ځواکونه وباسي.
امریکا پلان لري چې خپل ځواکونه به د ۲۰۲۰ کال وړاندې له افغانستان څخه بهر کړي هغه ځواکونه چې د افغان امنیتي ځواکونو د همکارۍ لپاره افغانستان کې په ۹ اډو کې مېشت دي.
ډونالډ ټرمپ بهرنیو چارو وزیر مایک پمپیو ته لارښوونه کړې او هغه به په دې لارښوونه عمل وکړي.
ها خوا امنیت شورا وایي، دوی له امریکا سره امنیتي تړون لري او افغان ځواکونه کولای شي تر دوه زره او شلم کال پورې په ځان بسیاء شي.
امریکا سره د سولې په خبرو کې د طالبانو اساسي غوښتنه له افغانستان څخه د ټولو بهرنیو ځواکونو وتل وو.
د امریکا د بهرنیو چارو وزیر مایک پمپیو داسې ویلي (( د امريکا ولسمشر نه زما مالومات دادي، چې هغه د نه ختمېدونکې جګړې د پايته رسولو په اړه مشوش دی، چې سرتېري را بهر کړي، را کم يې کړي او که يوازې موږ به هلته نه يو. هغو هېوادونو ، چې افغانستان کې دنده کړې په دې پوهېږي، چې غوڅ ملاتړ ماموريت کې د اروپا او نړۍ هېوادونه شامل دي. زه هيله لرم، چې په سيمه کې د جګړه ييز ځواک لپاره اړتياوې راکمې شي. دا نه تنها زما هيله ده بلکې ډېره به په زړه پورې هم وي. ولسمشر غواړي هغوی ته خپل هېواد وسپاري او موږ خپل ميليونونه ډالر مصارف را کم کړو.))
دا مهال افغانستان کې نږدې ۱۴۰۰۰ بهرني ځواکونه دېره دي خو اوس چې د وتلو پرسر هوکړه شوې د افغانستان امنیت شورا وایي جګړه ورته له مخکې پاتې ده او افغان امنیتي ځواکونه خپله خاوره ساتلی شي.
ها خوا د پاکستان د باندنیو چارو وزیر ویلي، افغانستان کې د جګړې په اړه د هېوادونو په تګلارو کې بدلون راغلی او اوس ټول په دې باوري دي، چې افغانستان کې ستونزه سیاسي حل غواړي نه جنګي.
د پاکستان د بهرنیو چارو وزیر شاه محمود قریشي داسې ویلي (( د امریکا او هغو هېوادونو د رهبرۍ په پالیسیو کې ژور بدلون راغلی چې پخوا د ستونزې حل لپاره د سیاسي لارو چارو پر ځای په افغانستان کې د پوځي ځواک له لارې د سولې په لټه کې وو.))
د امریکا له تازه څرګندونو داسې جوتیږي چې طآلبانو سره خبرې بریالۍ دي او امریکایي ځواکونه نور افغانستان کې د پاتې کېدو تکل نه لري.
خو ټینګار زیات په دې کېږي چې د بهرنیو ځواکونو وتل باید تدریجي اوسي او امریکا نه باید له وتلو وروسته په افغانستان باندې خپلې مرستې او همکارۍ محدودې او کمې کړي.
