د فلسطین دوه ستر ګوندونه د امریکا د سولې پلان پر وړاندې یو لاس شوي دي.
حماس او فتاح دواړو ګوندونو د ټرمپ دغه پلان رد کړی او په بحرین کې روان کنفرانس یې په اقتصادي لفافه کې پټه سیاسي غونډه بللې ده.
اخوا په اردن او خپله بحرین کې میشتو فلسطنیانو هم د بحرین د اقتصادي کنفرانس پر ضد لاریونونه کړي دي.
فلسطین ته په هیڅ ډول د امریکا د سولې پلان د منلو وړ نه دی.
د فلسطین دوه سیال ګوندونه په دې موضوع کې شریک نظر لري او په بحرین کې د روان کنفرانس چې امریکا یې مشري کوي، هم مخالفت کوي. غزې تړانګه کې د حماس ډلې مشر اسعمیل حنیه وايي د بحرین کنفرانس په اقتصادي لفافه کې پټه سیاسي غونډه ده.
د حماس ډلې مشر، اسمعیل حنیه وویل، ((بحرین کې چې اوس کوم اقتصادي کنفرانس دوام لري هغه ته اقتصادي پوښ ورکړ شوی دی. دا داسې کنفرانس دی چې مالي او اقتصادي رنګ ورکړل شوی دی. ځکه دا د یوې پیړۍ تړون موخه دا ده چې د فلسطین غوښتنې ناکامې کړي. دویم دا چې سهونیستي نظام لا پراخه کړي او په ټوله لویدیځه تړانګه کنټرول ترلاسه کړي.))
غونډه کې له حماس سره سیالې سیاسي ډله فتاح هم ګډون درلود او ددې کنفرانس مخالفت یې کاوه.
حنیه وايي هیڅکله به فلسطیني خاوره چاته ور نه کړي او د بیت المقدس په رسمیت پیژندل ورته اوس هم غیرقانوني دي.
اخوا په اردن او خپله بحرین کې هم د بحرین د کنفرانس پر خلاف لاریونونه روان دي.
دغه لاریونونه په اردن او بحرین کې میشت فلسطني کډوال کوي.
د ټرمپ زوم او لوړ پوړی سلاکار کوشنر چې د بحرین د کنفرانس مشري کوي، ادعا لري چې د بحرین کنفرانس اقتصادي بڼه لري او اوس مهال د سولې له تړون ډیر مهم دی.
