د طالبانو مشر ملا هبة الله د کوچني اختر په مناسبت خپرې شوې اعلامیه کې ادعا کړې چې بهرني ځواکونه په افغانستان کې له ماتې سره مخ شوي دي.
په اعلامیه کې راغلي چې د جګړې ډګر کې د طالبانو عملیات او سیاسي ډګر کې له امریکایانو سره د مذاکراتو موخه د بهرنیو ځواکونو ایستل او د اسلامي نظام حاکمول دي.
په اعلامیه کې ټینګار شوی چې طالبان د واک انحصار نه غواړي او باور یې ښودلی چې په نظام کې به ټول افغانان ځانونه وویني.
اعلامیه کې بین الافغاني مذاکراتو ته هم اشاره شوې چې کافي پرمختګ یې کړی او دا هم لیکل شوي چې طالبان په سیاسي تعاملاتو کې پر دوه مخي سیاست باور نه لري.
په اختریزه اعلامیه کې د بهرنیو او کورنیو ځواکونو بمباریو ته هم اشاره شوې چې ګواکې ملکیانو ته مرګ ژوبله اړوي.
د طالبانو مشر ادعا کړې چې د حکومت په زندانونو کې بندیان ربړول کېږي.
ملا هبة الله له خپلو پلویانو غوښتي چې د ملکي مرګ ژوبلې مخنیوي برخې ته پام وکړي، له بندیانو سره سم چلند وکړي او د عام المنفعه پروژو ساتنه وکړي.
افغان حکومت تر اوسه د طالبانو د مشر اختریز پیغام په غبرګون کې څه نه دي ویلي.
