مسکو کې د سولې په تړاو ناسته د سه شنبې په ورځ پيل کیږي چې دوه ورځې به دوام پيدا کړي.
پخواني ولسمشر او یو شمېر سیاسیونو خپل چمتووالی نیولی چې د مسکو غونډه کې ګډون وکړي او دا غونډه د سولې د خبرو د پيل لپاره یو ښه فرصت یادوي.
حامدکرزي په یوه اعلامیه کې باور ښودلی چې په دې غونډه کې ګډون به د دې زمینه برابره کړي چې بین الافغاني خبرې پيل شي.
مخکیني ولسمشر حامد کرزي داسې ویلي (( موږ د مسکو په غونډه کې په دې تمه ګډون کوو چې د بین الافغاني خبرو لپاره به پکې زمینه برابره شي، موږ له دې غونډې د ښه لاس ته راوړنو په تمه یو، موږ په دې برخه کې پر حکومت غږ کوو چې یو باصلاحیته پلاوی د مسکو غونډه کې د ګډون لپاره ولیږي او د دوامدارې سولې رسیدو لپاره دې خپل رول ادا کړي.))
روسیې د دې ناستې کوربتوب رد کړی او ویلي یې دي چې روسیه کې میشت افغانان د غونډې کوربانه دي.
د طالبانو له اړخه به عباس ستانکزی د طالبانو د استازو مشري کوي.
طالبانو په یوه اعلامیه کې داسې ویلي ((موږ غواړو له مناسب فرصت څخه په سالمه استفاده خپل شرعي او اصولوي موقف بیلابیلو جهتونو ته څرګند کړو، د اشغال د خاتمې، په هیواد کې د دائمي سولې او د افغان شموله اسلامي نظام د حاکمیت او د راتلونکي افغانستان په اړه د اسلامي امارت پالیسي او کړنلاره ډاګیزه کړو.))
دغه ناسته کې افغان حکومت ته چې د جګړې یو اړخ بلل کيږي د ګډون بلنه نه ده ورکړل شوې ، افغان حکومت هم دا غونډه بې ګټې یادوي چې د افغانانو په مشرۍ او کوربتوب نه ده.
